भांगरभूंय | प्रतिनिधी
भांगरभूंय । खबरां मेज
पणजीः प्रायोरिटी टायटन्सान मानस मेव्हरिक्स पंगडाक हारोवन पणजी जिमखाना मेंबर्स (पीजीएमएल) लीग क्रिकेट सर्तीचे फायनलींत प्रवेश केलो. धेंपो चलेन्जर्सान प्रेसकॉन पँथरांक हारोवन सर्तीचे सेमी फायनीलंत प्रवेश केला.
पणजी जिमखाना मैदानार आयतारा जाल्ले सेमीफायनलींत प्रायोरिटी टायटन्सान टॉस जिखून मानस मेव्हरिक्साक पयलीं खेळपाक सांगलें. तांची सुरवात बाबत जाली आनी मदले फळयेचेर चेंपण आयलें. धिल्लन शहान 26 बॉलांत 28 धांवड्यो करून डाव साल्वार केलो. तो रन आवट जालो. मानस मेव्हरिक्सान आपल्या 20 ओव्हरींत 8 बाद 136 धांवड्यो केल्यो. टायटन्साच्या हर्ष जेठाचीन 13 धांवड्यांत 2 विकेटी घेतल्यो.
टायटन्साच्या मुक्तियर काद्रीन 29 बॉलांत 35 आनी वेदांत नायकान 20 बॉलांत 34 धांवड्यो करून पंगडाचें जैत निश्चीत केलें. एक ओव्हर आनी एक बॉल बाकी आसतना ताणी पंगडाक जैत मेळोवन दिलें. जैता खातीर तांकां फकत तीन गड्यांचें मोल दिवचें पडलें. काद्री मॅन ऑफ दी मॅच थारलो. सर्तीतली दुसरी सेमीफायनल धेंपो चलेन्जर आनी मानस मेव्हरीक्स हाचे मदीं जातलीं आनी ते उपरांत 5 फेब्रुवारीक जावपी फायनलींत प्रयोरिटी टायटन्सा वांगडा कोण खेळटलो हें थारतलें.
आयतारा जाल्ले दुसरे मॅचीं धेंपोन प्रेसकॉन पँथरांक 4 विकेटींन हारयलें. पँथरान पयलीं खेळून 20 ओव्हरींत 8 बाद 161 धांवड्यो केल्यो. ओपनर सैफ काराजीन 30 बॉलांत 40 आनी मेहुल जिरगेन 31 बॉलांत 36 धांवड्यो करून पंगडाक बरी सुरवात करून दिली. साझू नायकान 15 धांवड्यांत 2 विकेटी घेतल्यो. धेपोचो कॅप्टन आदित्य आंगलेन 33 बॉलांत 38 धांवड्यो केल्यो जाल्यार देवीदास खोलकारान 22 बॉलांत 37 धांवड्यो केल्यो. धेंपोन जैताक जाय आशिल्ल्यो धांवड्यो 17.5 ओव्हरींत काडल्यो. आदित्य आंगले मॅन ऑफ दी मॅच थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
