भांगरभूंय | प्रतिनिधी
शार आनी नगर नियोजन खात्यान हडफडें, नागवा, पर्रा, कांदोळे आनी काळंगूट गांवां खातीर प्रादेशीक आराखडो सद्याचे परिस्थितींत चालीक लावचो. कारण प्रादेशीक आराखडो ह्या वाठारां खातीर चालीक लायिल्लो आनी उदरगती खातीर लोकां खातीर काम करपाक सुरवात करची. उच्च न्यायालयाच्या आदेशाच्या गुणवत्तेचो विचार करून भौसाक विभागणी प्रमाणपत्रां, पुनर्बांदणी मंजुरी, तंत्रीक आदेश, पूर्णताय आदेश आदीं दिवपा खातीर प्रादेशीक आराखडो चालीक लावप म्हत्वाचो. प्रादेशीक आराखडो 21 चो हेत सैमीक आच्छादनाची राखण करप आनी तातूंत ‘सैमीक आच्छादन’ सारकिल्ल्या वाठारांचो आस्पाव जाता, जाका लागून पर्यावरणीय नदरेन संवेदनशील वाठारांनी उदरगतीचो दाब येवचो न्हय. उच्च न्यायालयाच्या आदेशा वांगडाच हालींच्या घडणुकांनी आनी मनमानी जमनीचें रुपांतर करपाच्या आरोपांनी ह्या विशिश्ट गांवां खातीर प्रादेशीक आराखडो चालीक लावपाच्या आव्हानांचेर भर दिला. न्यायालयान आपली भुमिका जबाबदारपणान पार पाडल्या. पूण सरकारान लोकहिताचे नदरेन कांय निश्कर्श काडूंक जाय.
गोंय सरकाराच्या शार आनी नगर नियोजन खात्या प्रमाण प्रादेशीक येवजण 21 ही विशिश्ट गांवांची प्रादेशीक येवजण आसा. ना? मागीर तें खूब बरें जाले. फकत कायदेशीर रितीन प्रादेशीक आराखडो चालीक लावप गरजेचें.
प्रादेशीक आराखड्यात, पाचवें आच्छादन सांबाळपा खातीर आनी ह्या वाठारांक उदरगती पसून राखण दिवपा खातीर ‘सैमीक आच्छादन’ विभाग अशे नवे वर्गीकरण आसा. ही गजाल लोकांक बरीच खबर आसा. पूण कितें चुकलें? न्यायालयान चुको सुदारल्यात. उरिल्ल्यांक सरकार दुरुस्त करतलें. प्रादेशीक येवजणेची अंमलबजावणी करतना मनमानी जमनीचें रुपांतर आनी प्रक्रिया उल्लंघनाचे आरोप खूब काळा सावन सुरू आसात. हें जनहीत याचिकेन दाखयलां.
थोड्याच उतरांनी सांगपाचें जाल्यार प्रादेशीक आराखडो 2021 हो ह्या वाठारां खातीर अधिकृत आराखडो आसा. शार आनी शार नियोजन खात्यान ताची प्रत्यक्ष अंमलबजावणी करपाक म्हत्वाच्या समस्यांक तोंड दिवचें पडलां, जाका लागून टिका आनी चवकशी जाल्या. पूण प्रादेशीक येवजणेंतल्यान सामान्य लोकांक कित्याक वंचीत दवरचें? सरकारान हडफडें, नागवा, पर्रा कांदोळे आनी कंळगूंट गांवां खातीर प्रादेशीक आराखडो चालीक लावचो. कारण सरकार ही एक सततची प्रक्रिया. लोकांनी आपलीं घरां बांदूं आनी पोटा धंद्याक लागूं
राजेश बाणावलीकार,
विएसवाडो, हडफडे, बार्देस- गोंय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
