भांगरभूंय | प्रतिनिधी
गोंयांत 1990 दशकाच्या पयलीं सोरोप, गार, दुकर गांवांत आयलो जाल्यार ताका जिवेशीं मारताले. चुकून कोणूय रानां खात्याच्या अधिकाऱ्यांक कळयताले. उपरांत ल्हवू ल्हवू करून प्राणीमित्रांचो आंकडो वाडलो आनी मोनजातीचो जीव वाटावलो. दिवचले अमृत सिंह हे अॅनिमल रेस्क्यू स्काॅड चलयतात. तांणी ह्या काळांत खूब तरणाट्यांक सोरोप वा हेर रानवटी जीव कशे धरप आनी तांकां सुरक्षीत रानांत व्हरून कशे सोडप हें शिकयलें. आयज अक्षरशा दरेका गांवांत उणेच दोगजाण तरी प्राणीमित्र आसात. कोणाच्याय घरांत सोरोप आयलो जाल्यार ते पयशांची कसलीच अपेक्षा दवरीनासतना स्वताचो जीव धोक्यांत घालून ताका धरतात. दरवर्सा सादारण 45 हजार सोरपांचो जीव ते वाटायतात. ताचे भायर बिबटे, गार, दुकर, मुंगुस आसातूच. मात, सरकाराची तांचे हे समाजसेवे कडेन तशी आडनदर जाल्या. निदान तांचे खातीर विशेश पदांची निर्मिती करपाक जाय, अशी प्रतिक्रिया अमृत सिंह हांणी काल नागपंचमी निमतान उक्तायली.
प्राणीमित्रांक लागून गोंयांतल्या हजारांनी सोरपांचो जीव वाटावला, हें वेगळें सांगपाक नाका. बिबटे, दुकर, मानगीं, गवेय गांवांत येतात, बांयंत पडटात. कांस करपाक लायिल्ल्या सांपळ्यांतूय आडकतात. हें त्या प्राण्यांकूच न्हय, तर थळाव्यांकूय धोक्याचें थारूं येता. हे प्राणीमित्र थंय वतात आनी मोनजातीची सुटका करतात. प्राण्यांची तस्करीय तांणी आडायल्या. गोंयच्या रान खात्यान 40 प्राणीमित्रांक दिसवड्याच्या कोंतार कामाक घेतल्यात. तांकां 14 हजार रुपया पगार दितात. तर कांय सोरोप धरप्यांची रानां कार्यालयांनी नेमणूक केल्या. पूण, फोन आयलो काय तांकां खूब पयसुल्ल्यान थंय वच्चें पडटा. तो मेरेन तो सोरोप पळून वचपाक शकता वा कोण ताका मारूं शकता. रानां कार्यालयांनी थळाव्या प्राणीमित्रांक कायम नोकरी दिल्यार तांच्या कार्याची दखल घेतिल्ले सारकी जातली. कारण तांकां फक्त सोरोपूच न्हय, तर हेर प्राणी धरपाक कळटा. जांकां जमना तांकां प्रशिक्षण दिवं येता. मुळांत जनावरां विशीं मोग, आवड आशिल्ले तरणाटे रानां खात्यांत आसपाक जाय. फक्त पगार मेळटा म्हूण करपाची ही सरकारी नोकरी न्हय, हें कोणूय सांगतलो.
गोंयांत सांगें, सत्तरी, धारबांदोडें, काणकोण, केपें वाठारांत आनी जंय रानां आसात थंय प्राण्यांचो वावर आसता. जनावरां लागसारच्या गांवांनी आयलीं काय अर्थांतूच प्राणीमित्र वा रानां अधिकारी तांकां धरतात. मात जनावरां जखमी जालीं, जाल्यार तांचेर उपचार करपाक मेळनात. कारण प्राणीमित्रांच्या म्हणण्यां प्रमाण, फक्त बोंडला प्राणीसंग्रहालयांतूच ही सुविधा आसा. राज्यांतल्या खाची कोनशांतल्यान तांकां थंय घेवन वचप वेळकाडू आनी खर्चीक. देखून रानां आशिल्ल्या तालुक्यांनी तरी प्राणी उपचार केंद्रां सुरू जावप गरजेचें. प्राणीमित्र सोरोप धरतात खरे, पूण तें तांच्या जिवार येवं येता. खास करून नाग, किंग कोब्रा बी धरतना. खुद्द अमृत सिंहाक कांय वर्सां पयलीं जखमी नागान घांस मारिल्लो. तेन्ना सगल्या प्राणीमित्रांचो विमो सरकारान बेगोबेग देंवोवपाक जाय. सरकारा कडल्यान हे बाबतींत मजत जायना. निदान हेर कसलीय अर्थिक तजवीज करपाची गरज आसा. बिबट्या सारको हिंसक प्राणी बांयंत पडटा तेन्ना ताका धरपाक पांजरो, जाळां, गुंगेचें इंजेक्शन लागता, तें रानां खात्या कडेन आसा. तें घडणूक थळाचेर येता म्हणसर बरोच उशीर जावं येता. तेन्ना ह्यो सुविधा प्राणीमित्रां कडेन आसल्यार तांकां सोंपेंपण मेळूं येता. अर्थांत हाचेंय प्रशिक्षण तांकां दिवचें पडटलें.
प्राणीमित्र फकत रानवटी जीवूच हाताळीनात, तर संकश्टांत सांपडिल्ल्या गोरवां, सुण्यांचोय जीव वाटायतात. गोशाळा जायते फावटी तांची मजत घेता. रातच्या वेळार हेडपी गोरवां ही पसून गोंयांतली एक व्हडली समस्या जाल्या. कारण रस्ताद गोरवां, सुण्यांचो बंदोबस्त करपाचो न्यायालयान पालिका, पंचायतींक आदेश दिला आसतनाय ही समस्या हाताळपांत स्वराज्य संस्थांक अपेस आयलां. गोरवां पोसपी शेतकारांचो आंकडो देंवला आसलो तरी रस्त्या वयलीं गोरवां मात्तूय उणीं जावंक ना. मोनजातीक मजत करप हे पवित्र कार्य. ते खातीर सरकारान प्राणीमित्रांच्या उल्याक ओ दिवपाक जाय. नोकरी मेळ्ळ्यार तांकां अर्थीक थीरताय येतली आनी ते आनीक नेटान हें कार्य करपाक शकतले. विचार जावचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
