भांगरभूंय | प्रतिनिधी
अयोध्या, खबरां संस्था ः अयोध्येच्या रामलल्ला देवळांत प्राणप्रतिश्ठा सुवाळो जालो. ह्या दिसा भुरग्याक जल्म दिवपा खातीर जायत्या गुरवार बायलांनी हॉस्पिटलांत ‘सिजेरियन डिलीव्हरी’ करपाची विनवणी केल्ली. ते प्रमाण सोमारा 22 जानेवारीक जायत्या बायलांची डिलीव्हरी जाली. फिरोजाबादांतल्या एके मुसलमान बायलेनय सोमारा एका भुरग्याक जल्म दिलो. ह्या खाशेल्या दिसा भुरगें जल्माक आयिल्ल्यान हे आवयन आपल्या भुरग्यांचो नांव हिंदू- मुसलमान एकचाराचे संदेश दिवपी दवरलें.
फरजानान सोमारा भुरग्याक जल्म दिल्ल्याची म्हायती फिरोझाबादांतल्या जिल्लो बायलां हॉस्पिटलाचे प्रभारी नवीन जैन हांणी दिली. नवजात भुरगें आनी आवयची भलायकी बरी आसा. भुरग्याची आजी हुस्ना बानू हिणी भुरग्याचे ‘राम रहीम’ अशें नांव दवरलां. हिंदू- मुसलमान एकचाराचे संदेश दिवपा खातीर हें नांव दवरलां, अशें बानू हांणी सांगलें.
राम, राघव, राघवेंद्र, रघु….
कानपूरच्या गणेश शंकर विद्यार्थी मेमोरियल मेडिकल कॉलेजींतल्या प्रसूती आनी स्त्रीरोगविज्ञानाचे कार्यवाह प्रभारी सीमा द्विवेदी हांणी सांगलें, सोमारा हांगा 25 भुरगीं जल्माक आयल्यात. 25 अर्भकां मदीं 10 चलयो आनी उरिल्ले चले आशिल्ले. भारती मिश्रान सोमारा एका भुरग्याक जल्म दिलो. भुरग्याच्या व्यक्तिमत्वाचेर ताचो सकारात्मक परिणाम जातलो अशें मानून तिणेंय भुरग्याचे ‘राम’ अशें नांव दिलां. जाल्यार हेर आवयांनी आपल्या भुरग्यांक राघव, राघवेंद्र, रघु, रामेंद्र अशा भगवान रामाचीं पर्यायी नांवां दिल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
