भांगरभूंय | प्रतिनिधी
शास्त्रज्ञांनी हालींच दोन प्राचीन इजिप्शियन ममींचें सीटी स्कॅन केलें. स्कॅनाचे निकाल अजापीत करपी आसात, तज्ञांक लेगीत अजापीत करपी आसात. ममींच्या तपासणींतल्यान दिसून आयलें, प्राचीन काळांत लेगीत मनशांक आयचे सारकोच भलायकी समस्यांक फुडो करचो पडटालो.
एका मिडिया रिपोर्टा प्रमाण, स्कॅन केल्ली पयली ममी नेस-मीन आशिल्ली, जी इ.स.पू. 330 च्या सुमाराक 40 व्या वर्सा संवसाराक अंतरली. स्कॅनांत तिचे फाटींचो कणो आनी बोरी मोडिल्ल्याचे पुरावे सांपडले. संशोधकांक नेस-मिनचे कुडीचेर कांय बुराक आनी खुणो लेगीत दिसल्यो ज्यो असैमीक आशिल्ल्यो.
इमेजींग विभागाचे मुखेली समर डेकर हांकां विस्वास आसा, हे गूण एकादे प्राचीन शस्त्रक्रियेचो परिणाम आसूं येतात. मजगतीं, नेस-होर ममीक सुमार 190 इसपू पिरायेच्या 60 वर्सा मरण आयलें. दातांची गंभीर समस्या सांपडली. हाचे वयल्यान अशें दिसून आयलें, हजारांनी वर्सां आदीं लेगीत लोक जाण्टेपण आनी सांधेदुखीन पिडेस्त आशिल्ले.
शास्त्रज्ञांनी ह्या ममींचो गूट उक्तो करचे खातीर तांकां हात लेगीत लावंक ना. तांणी तांचे तपासणे खातीर एक बळिश्ट 320- स्लायस सीटी स्कॅनर वापरलो, जो 0.5 मिलीमिटर इतल्यो बारीक आनी अचूक फोटो घेवपाक सक्षम आशिल्लो. ममींक तांच्या काशावांतल्यान लेगीत भायर काडूंक ना. मशिना वरवीं तांचे कुडीचें पुराय 3 डी स्कॅनींग केलें. हे तंत्र हॉस्पिटलांत जिवीत व्यक्तीची तपासणी कशी करतात, ताचे सारकेंच आसा. ह्या व्हर्च्युअल पोस्टमार्टमा वरवीं, शास्त्रज्ञ आतां ममींचे सांपळे, तांच्या अवयवांची रचना आनी तांचे कुडींत आशिल्लो कसलोच प्राचीन धातू वा ताबिजांचें कसलेंच लुकसाण करिनासतना परिक्षम करपाक मेळटा.
डरहम विद्यापिठाची प्राध्यापक क्रिस्टिना रिग्ज हांच्या मतान, प्राचीन इजिप्तांत कूड सांबाळपाची प्रक्रिया एक पवित्र आनी गुप्त सुवात आशिल्ली. ती सासणा खातीर गुप्त दवरपा खातीर डिझायन केल्ली. तिच्या मतान, ह्या कुडींचें भौशीक तरेन प्रदर्शन करप वा स्कॅन करप हो प्राचीन विस्वासाचो अपमान थारूं येता. जर एकादे व्यक्तीचे इत्से आड ताचे गोपनियेतेचें उल्लंघन केलें जाल्यार कसलेंय तंत्रज्ञान पुराय करेन आदराचें आसपाक शकना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
