भांगरभूंय | प्रतिनिधी
मुख्यमंत्र्यांचो दोतोरांक सल्लो
आयज चर्चा करपाची तयारी
शिस्तपालन समितीचो निर्णय
भांगरभूंय । प्रतिनिधी
पणजी : भलायकी मंत्री विश्वजीत राणे हांणी जीएमसींतले डॉ. रुद्रेश कुट्टीकार हांचे वांगडा केल्ल्या गैरवर्तनाचो मुख्यमंत्री डॉ. प्रमोद सावंत हांणी निशेध केलो. तांणी सोमारा दोतोरांची भेट घेवन आंदोलन थांबोवचें, असो सल्लो दिलो. आंदोलन करपी दोतोरांच्यो मागण्यो तत्काळ मान्य करपा सयत जीएमसींत अशे प्रकार घडचे न्हय हे खातीर शिस्तपालन समिती स्थापन करपाचो निर्णय मुख्यमंत्र्यान घेतला. तशेंच गरज पडली जाल्यार मंगळारा जीएमसींत वचून दोतोरां कडेन चर्चा करपाचीय तांणी तयारी दाखयल्या.
जीएमसींत आयिल्ले जाण्टे बायलेक इंजेक्शन दिवंक नाशिल्ल्याचो मुद्दो उपस्थीत करून भलायकी मंत्री विश्वजीत राणे हांणी चार दिसां आदीं जीएमसींत वचून मुख्य वैजकी अधिकारी डॉ. रुद्रेश कुट्टीकार हांकां तापयल्लो. दोतोर, कर्मचारी आनी दुयेंतीं मुखार मंत्री राणे हांणी डॉ. कुट्टीकार हांकां अपमानाची वागणूक दिल्ली. तशेंच तांकां निलंबीत करपाचो लेगीत आदेश वैजकी अधिक्षक डॉ. राजेश पाटील हांकां दिल्लो.
हे संबंदांतलो व्हिडियो सोशल मिडिया वयल्यान व्हायरल जाले उपरांत विरोधी पक्षांनी मंत्री राणे हांचेर टिका केली. फेडरेशन ऑफ ऑल इंडिया मॅडिकल असोसिएशन (एफएआयएमए) आनी इंडियन मॅडिकल असोसिएशनान (आयएमए) लेगीत कामाचेर आसतना दोतोराचो अशे तरेन अपमान केल्ले खातीर मंत्री राणे हांचेर खर टिका केली. मुख्यमंत्री डॉ. प्रमोद सावंत हांणी 72 वरां भितर हे संबंदांत कारवाय करची, ना जाल्यार देशभर आंदोलन करपाची शिटकावणी एफएआयएमए हाणें दिल्ली. ते उपरांत मुख्यमंत्री डॉ. प्रमोद सावंत हांणी तातूंत हस्तक्षेप करून डॉ. कुट्टीकार हांचें निलंबन करचे ना अशें सांगलें. दुयेंतींचे जीव वाटावपा खातीर धडपडपी जीएमसींतल्या दोतोरांचेंय तांणी कवतूक केल्लें.
डॉ. कुट्टीकार हांकां सगल्यां मुखार दिल्ल्या अपमानास्पद वागणुकेची जाणीव जाले उपरांत मंत्री राणे हांणी आयतारा रातीं डॉ. कुट्टीकार हांचे सयत तांच्या कुटुंबांची लेगीत माफी मागली. तेच वांगडा दुयेंती विशीं आशिल्ले तळमळींतल्यानूच आपूण कुट्टीकार हांकां तापयलो. पूण तांच्या निलंबनाचो आदेश जारी करूंक ना, अशेंय तांणी स्पश्ट केलें.
हो वाद तापिल्लो आसतनाच सोमारा सकाळी आयएमएचो गोंय फांटो, जीएमसींतले विभाग मुखेली, निवासी दोतोर आनी वैजकी शिक्षण घेवपी विद्यार्थ्यांनी सोमारा सकाळीं डीन डॉ. शिवानंद बांदेकार हांच्या कार्यालया मुखार खर आंदोलन करून, न्याय दिवपाची मागणी बांदेकार हांचे कडेन केली. ते उपरांत दोतोरांच्या पंगडान मुख्यमंत्री डॉ. सावंत हांची तांच्या सरकारी बंगल्यार भेट घेतली. तांचे कडेन संवाद सादतना तांणी मिडिया मुखार डॉ. कुट्टीकार हांची माफी मागल्या. ताका लागून हो विशय हांगाच सोंपोवचो, असो सल्लो दोतोरांच्या पंगडाक दिलो.
अपमान केला, थंयच येवन माफी मागची
भलायकी मंत्री विश्वजीत राणे हांणी जे सुवाचेर येवन आपलो अपमान केला, थंयच येवन फुडल्या 24 वरां भितर तांणी कॅमेरा मुखार आपली माफी मागची. ते उपरांतूच आमची पुडली कृती थारायतले, अशें डॉ. रुद्रेश कुट्टीकार हांणी सोमारा पत्रकारां कडेन उलयतना सांगलें. तशेंच ज्या बी-12 इंजेक्शनाक लागून हो वाद जालो, तें इंजेक्शन सरकारी भलायकी केंद्रांत लेगीत उपलब्ध आसता. तें आपत्कालीन इंजेक्शन नाशिल्ल्याचें डॉ. कुट्टीकार हांचे सयत आंदोलन करपी हेर दोतोरांनी स्पश्ट केलें.
पुलीस फौजफांटो वाडयलो
भलायकी मंत्री विश्वजीत राणे हांणी डॉ. रुद्रेश कुट्टीकार हांची जाहीर माफी मागची, हे मागणे खातीर आंदोलन करप्यां मदीं जीएमसींतले चडशे दोतोर आनी वैजकी विद्यार्थ्यांचो आस्पाव आसलो. तांचें आंदोलन पेटचें न्हय, हे खातीर जीएमसी वाठारांत पुलिसांचो अदीक फौजफांटो तैनात केला.
दोतोरांची मागणी मंत्र्या मेरेन पावयल्या : डीन
भलायकी मंत्री विश्वजीत राणे आनी डॉ. कुट्टीकार हांचे मदीं घडिल्लो प्रकार कोणाकूच आवडूंक ना. मंत्री राणे हांणी हे संबंदांत आदींच माफी मागल्या, पूण आंदोलक दोतोरांची मागणी तांचे मेरेन पावयल्या. डॉ. कुट्टीकार हांच्या निलंबनाचो आदेश जारी जावंक ना. ते खातीर तांचें निलंबन वा चवकशेचो प्रस्नूच येना. जीएमसींत अशे तरेच्यो घडणुको परतून घडच्यो न्हय हाची आमी पुराय जतनाय घेतले. दुयेंतींचेर उपचार चालू आसतना विभागांत वचून व्हिडियो काडपाचे प्रकार हाचे फुडें निश्चीत बंद जातले. जीएमसींतली व्हीआयपी संस्कृती बंद करतले. भलायकी मंत्र्यांच्या प्रकरणांत व्हिडियो काडिल्ले व्यक्ती आड गुन्यांव नोंद करतले. आपत्कालीन विभागा संबंदांत चार विभाग मुखेल्यांच्या फुडारपणा खाला देखरेख समितीची स्थापना करतले, अशें डॉ. शिवानंद बांदेकार हांणी सांगलें.
सगल्या विभागांतल्यो सेवा आशिल्ल्यो चालू
भलायकी मंत्री विश्वजीत राणे हांचे कृतीचो निशेध करीत जीएमसींतल्या दोतोरांनी सोमारा आंदोलन केलें. पूण ताचो उपचारा खातीर आयिल्ल्या दुयेंतींक मार बसचो न्हय, हाची जतनाय घेतिल्ली. ताका लागून आपत्कालीन हेर सगल्या विभागांतल्यो सेवा नियमीत पद्दतीन चालू आशिल्ल्यो, अशी म्हायती सुत्रांनी दिली.
आंदोलक दोतोरांच्यो मागण्यो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
