प्रस्नोत्तरा परस लक्षवेधी, झीरो आवराकूच दाखयली सत्ताधाऱ्यांनी चड उमळशीक

भांगरभूंय | प्रतिनिधी

० प्रेमेंद, आलेक्स रेजिनाल्ड कडल्यान सगळ्यांत चड 70 प्रस्न

० मायकल, डिलायला, रूडॉल्फ, गोविंद, सिक्वेरा, आर्लेकरा कडल्यान प्रस्नूच ना

भांगरभूंय । प्रतिनिधी
पणजी : विरोधी आमदारां भशेन मंत्री नाशिल्ल्या सत्ताधारी आमदारांक प्रस्न विचारपाची संद आसता. बऱ्याच वेळार प्रस्न विचारून सत्ताधारी आमदारूच मंत्र्या मुखार आडखळ निर्माण करता. ह्या अधिवेशनांत प्रस्नोत्तरा परस सत्ताधारी आमदारांनी झीरो आवर तशेंच लक्षवेधी सुचोवणे वेळार मुद्दे मांडले. ठोस टिका केली नासली तरी कांय प्रमाणांत उलोवपांतल्यांन तिडक दिश्टी पडली. सत्ताधारी आमदारां वतीन आमदार प्रेमेंद शेट आनी आलेक्स रेजीनाल्ड (अपक्ष) हांणी सगळ्यांत चड दरेकी 70 प्रस्न विचारले. हातूत तारांकीत आनी अतारांकीत प्रस्नांचो आस्पाव आसा.
सत्ताधारी पक्षाचे आमदार आसून लेगीत मायकल लोबो हांणी ह्यान पयली बरेंच खेपो सरकाराचेर टिका केल्या. हे खेपे मात तांचो एकूय प्रस्न नासलो. बर्च दुर्घटणेचेर तांणी लक्षवेधी सूचोवणी दाखल केल्ली. मात त्या वेळार ते गैरहाजीर राविल्ल्यान ही लक्षवेधी सूचोवणी चर्चेक आयली ना. मायकल लोबो हांचे सयत डिलायला लोबो, गोविंद गावडे, जेनिफर मोन्सेरात, आलेक्स सिक्वेरा, प्रवीण आर्लेकार आनी रूडॉल्फ फर्नांडीस हांचो एकूय तारांकीत वा अतारांकीत प्रस्न नाशिल्लो.
भाजपाचे आमदार प्रेमेंद शेट, डॉ. चंद्रकांत शेट्ये (अपक्ष), आलेक्स रेजिनाल्ड (अपक्ष) हांणी बरेंच मुद्दे मांडून उपस्थिती दाखयली.
सत्ताधारी आमदारांनी विचारिल्या तारांकीत आनी अतारांकीत प्रस्नांचो आंकडो असो: जीत आरोलकर (मगो) 6, चंद्रकांत शेट्ये (अपक्ष) 47, आलेक्स रेजिनाल्ड (अपक्ष) 70, केदार नायक 15, राजेश फळदेसाय 10, प्रेमेंद शेट 70, देविया राणे 17, संकल्प आमोणकार 36, कृष्णा साळकार 12, आंतोनियो वाझ (अपक्ष) 14, उल्हास नायक तुयेकार 3 आनी निलेश काब्राल 19.
झीरो आवराक मात गोविंद गावडे (3), कृष्णा साळकार (3), प्रवीण आर्लेकार (3), रूडॉल्फ फर्नांडीस (2), मायकल लोबो (1), निलेश काब्राल 4), डॉ. चंद्रकांत शेट्ये (3), देविया राणे (2), संकल्प आमोणकार (4), डिलायला लोबो (2), आलेक्स रेजिनाल्ड (3) ह्या सगळ्यांनी मुद्दे मांडलें.