भांगरभूंय | प्रतिनिधी
तिसरी ते आठवी मेरेनचे प्रस्नपत्रिका काडटलें एससीईआरटी
विद्यालयां प्रस्नपत्रिका तपासतलीं, निकाल तयार करतली
4 थी, 5 वी, 7 वी, 8 वीचे परिक्षा पद्दतीचें परिपत्रक
भांगरभूंय । प्रतिनिधी
पणजी : अंदूं सावन तिसरी ते आठवी मेरेनच्या सत्र परिक्षांची प्रस्नपत्रिका गोवा राज्य शिक्षण संशोधन आनी प्रशिक्षण मंडळान (जीएससीईआरटी) काडपाचो निर्णय घेतिल्ल्यान शिक्षकांक व्हड प्रमाणांत थाकाय मेळ्या. पेपरांची तपासणी आनी निकाल तयार करपाची जापसालदारी मात पयली भशेन विद्यालयांचेर आसतली. परिक्षा तशेंच निकालाचे पद्दती विशींचें परिपत्रक एससीईआरटीन जारी केलां.
अंतर्गत मूल्यमापन तशेंच बाह्य मुल्यमापनाची पद्दत आनी एसेसमेंट परिक्षेचे गूण हे विशींचो आस्पाव परिपत्रकांत आसा. अंदूं सावन तिसरी आनी सवी खातीर एनईपी लागू जाल्या. हाका लागून ह्या दोन यत्तां खातीरची पद्दत शाळांक पयलीच सुचीत केलां. अंदूं चवथी, पांचवी, सातवी आनी आठवे खातीर एनईपी लागू जावंक ना. हाका लागून ह्या यत्तां (ग्रेडी) खातीर परिक्षा पद्दतीचें परीपत्रक जारी केलां, अशी म्हायती गोंय राज्य शिक्षण संशोधन आनी प्रशिक्षण मंडळाच्यो संचालक मेघना शेटगांवकार हांणी दिली.
शिक्षकांक अंतर्गत तशेंच सत्र परिक्षांची प्रस्नपत्रिका काडपा सयत तपासणी तशेंच निकाल तयार करपाचीं कामां करचीं पडटात. अंदूं सावन तिसरी ते आठवी मेरेनच्या सत्र परिक्षेची प्रस्नपत्रिका जीएससीईआरटी काडटलें. हाका लागून शिक्षकांक कांय प्रमाणांत थाकाय मेळटली. णववी आनी धावेच्या परिक्षांची प्रस्नपत्रिका शालान्त मंडळ काडटा. हाका लागून मुळाव्या आनी विद्यालयीन शिक्षकां वयलो ताण कांय प्रमाणांत उणो जाला. पयलीं सत्र परिक्षांची प्रस्नपत्रिका विद्यालयांक काडची पडटाली. अंदूं एससीईआरटी काडटली, अशी म्हायती हेडगेवार विद्यालयाचे मुख्याध्यापक विलास सतरकार हांणी दिली.
परिक्षा/ मुल्यमापन पद्दतीचे मुखेल मुद्दे
– तिसरी ते आठवी मेरेनच्या सत्र परिक्षांची प्रस्नपत्रिका एससीईआरटी काडटले. तपासणी शाळांक करची पडटली. वेळापत्रका प्रमाण परिक्षा घेवची पडटली.
– तिसरी आनी सवी यत्ते खातीर सत्र परिक्षांची प्रस्नपत्रिका कॉम्पिटन्सीचेर (स्पर्धात्मक) आदारीत आसतले. हेर यत्तां खातीर कॉम्पिटन्सीचेर आदारीत प्रस्नपत्रिका ना.
– ज्या सत्रांत जो अभ्यासक्रम पुराय जातलो, ताचेर आदारीत सत्र (सेमिस्टर एंड) परिक्षेची प्रस्नपत्रिका आसतली.
– सत्र परिक्षेच्या प्रस्नपत्रिकेचो अभ्यासक्रम आनी प्रस्नपत्रिकेचो नमुनो विद्यालयांक धाडटले
– विद्यार्थ्याचें प्रगती पुस्तक तयार करपाचो फॉर्मट धाडटले.
– शब्दकोश आनी पुरवणी वाचनाक उर्बा दिवपाक जाय. – पयल्या आनी दुसरे यत्ते खातीर (ग्रेड) निपुणचेर आदारीत मुल्यमापन जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
