भांगरभूंय | प्रतिनिधी
पणजी : नगर नियोजन खात्यान पाळें-शिरदोना आनी कुडका गांवांतल्या कांय जमनींचे क्षेत्र बदल तशेंच जमीन वापर बदल प्रस्तावीत केलां. हे बदल तशेंच नगर नियोजन कायद्यांतले 39 अ कलम बेगोबेग फाटीं घेवप गरजेचें. अशें जावंक ना जाल्यार राज्यभर खर आंदोलन करपाची शिटकावणी आमदार वीरेश बोरकार हांणी दिली. शुक्रारा तांणी ग्रामस्थां सयत खात्यांच्या कार्यालयांत ह्या बदलां आड आक्षेप घेतले. तशेंच एसटी आयोगाकूय हाची प्रत दिली. ह्या वेळार अजय खोलकार, गोविंद शिरोडकार आनी हेर हाजीर आशिल्ले.
बोरकर हांणी, राज्य सरकारान नगर नियोजन कायद्याच्या कलम 39 अ खाला जशें गोंय विकपाक काडलां. पाळें शिरदोना, कुडका आदिवासी भावांची लोक संख्या चड आसा. ह्या लोकांनी फाटल्यो कितल्योशोच पिळग्यो हांगची जमीन सांबाळून दवरपाचें काम केलें. तांकां विस्वासांत घेनासतना सरकारान परस्पर हो निर्णय घेतला. प्रस्थापीत बदल हे दोंगोर भागांतले आसात. हे बदल जाल्यार हांगचे दोंगर, जमीन आनी पर्यायान हांगचो सैम उध्वस्थ जातलो. ह्या जमीन वापर बदलाचो फायदो गोंयच्या भायल्या कंपन्यांक जातलो.
तांणी म्हणलें, राज्य सरकार अंत्योदयाच्यो गजाली करता. आमी सगल्यांक घेवन मुखार सरपाच्यो गजाली करतात. खरें म्हणल्यार हें सरकार सामान्य मनशां खातीर न्हयच. सरकार फकत मूठभर गिरेस्तां खातीर काम करता. गोंयच्यो सुपीक जमनी, दोंगर, न्हंयो, झरे भायल्या लोकांक विकपा खातीरूच नगर नियोजन कायद्यांत बदल केल्यात. कांय बदल विधानसभेंत आयिल्ले तेन्ना हांवें तांकां विरोध केल्लो. मात म्हाका उलोवपाक दिवंक ना. भाजपाच्या डबल इंजिन सरकारान गोंय नश्ट करपाची सुपारी घेतल्या. मात आमी अशें जावपाक दिवचे ना. आमी गांवांगांवांनी वचून हे विशीं जागृताय करून हाका विरोध करतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
