भांगरभूंय | प्रतिनिधी
हालींच भारतीय क्रिकेट पंगडांतले विनोद कांबळी आनी सचीन तेंडुलकर हे आदल्या क्रिकेट खेळगड्यां वांगडा तांचे भुरगेपणांतले प्रशिक्षक रमाकांत आचरेकार हांचे यादी निमतान आयोजीत केल्ल्या सुवाळ्या दिसा एके माचयेर दिसले. पूण तातूंतलो विनोद कांबळी दुयेंसाचें अशक्तपण आयिल्ल्यान पांयाचेर उबो रावपाक लेगीत ताका कुस्तार तशेंच सडसडीत उलोवंकूय येनाशिल्लें. विनोद आनी सचीन भुरगेपणा सावन इश्ट. दोगांचोय एकच गुरू. पूण खेळांमळ आनी भौशीक जिणेंत कांय निर्णय विचार करून घेवचे पडटात ते सचीन तेंडुलकरान योग्य तरेन घेतले म्हूण आयज ताका संवसार क्रिकेटीचो देव मानता. पूण विनोद कांबळीचे कांय निर्णय चुकीचें थारले आनी तो वेगळेच दिकेन भरकटत गेलो.
जेन्ना तो क्रिकेट खेळांत नदरेंत भरपी कामगिरी करतालो तेन्ना तो उजवाडाच्या झोतांत आयिल्लो. प्रसार माध्यमां बरें -वायट कार्य केल्यार उजवाडांत हाडटात तशेंच कांबळी विशीं घडलें. “घर घुंवतकूच घराचे वाशेय घुंवतात” अशें म्हणटात. प्रसिद्धी आनी संपत्तीच्या वयल्या पावंड्यार आशिल्लो विनोद कांबळीक व्यक्तीगत आनी वेवसायीक जिणेंत घेतिल्ल्या चुकीच्या निर्णयाक लागून परतून जमनीर हाडलो. पश्चातापान सोरो पियेवपाक लागलो आनी तातूंतच क्रिकेट कारकिर्द पुरायपणान संपुश्टांत आयली. ते भायर भलायकी लेगीत हाल्ली.
समाज माध्यमाचेर रमाकांत आचरेकर हांचे यादी निमतान आयोजीत केल्ल्या सुवाळ्या दिसाचो व्हिडियो व्हायरल जालो. तातूंत एका तेंपार क्रिकेट खेळांमळार शेक गाजोवपी कांबळीची दयनीय अवस्था पळोवन क्रिकेट मोगींच्या काळजांत दुकां पाझरलीं. उपरांत 1983 वर्साच्या संवसारीक करंडांतल्या आपल्या पंगडांतल्या वांगड्यां वांगडा टीम इंडियाचो म्हालगडो क्रिकेट खेळगडो कपील देव हाणें कांबळीचें पुनर्वसन केंद्रांत भरती करपाक मजत करपाची इत्सा जाहीर केल्ली. 52 वर्सां पिरायेच्या विनोद कांबळीन कपील देवाची ऑफर मान्य करून रिहबांत दाखल जालाे. मानसीक वा हेर दुयेंती हॉस्पिटल वा पुनर्वसन केंद्रांत दाखल जातात. ताचे कारण भलायकी सुदारचे खातीर. वायटकारांक मनशांती आनी तांचो धीर वाडोवप चड गरजेचें आसता. मनाचेर जाल्ले आघात विसरपा खातीर मन थीर करपाक मानसशात्रीय दोतोर समुपदेशन करतात.
पूण विनोद कांबळीचे बाबतींत मात वेगळेंच चित्र नदरेक पडटा. सोशल मिडिया, यू ट्युबार विनोद कांबळी मुबंय भिवंडीतल्या आकृती हॉस्पिटलांत ताचे खाटी कुशीक वचून ताची मुलाखत घेतात. हो साममको तिडक हाडपा सारको प्रकार. एक दोन यू ट्युबर गेल्यार समजूं येता. पूण खूबशे जाण ताचे म्हऱ्यांत वचून ताका तेच तेच प्रस्न विचारून डिप्रेशनांत दवरपाचो यत्न करतात काय कितें अशें म्हाका विचारन दिसता. विनोद कांबळीची मुलाखत घेतात ताचें वांगडा दोतोरा कडेन दु्येंतीची अपडेट मागतात. कोणाक जाय जाल्यार हो सगलो प्रकार यु ट्युबार पळोवंक शकतात. आरे सभाग्यानो ताका आतां प्रसिद्धी नाका मानसीक आनी शारिरीक आधाराची गरज आसा. तें काम थंयचे दोतोर आनी तांचो पंगड बेस बरो करता आसतले हातूंत मात लेगीत दुबाव ना. विनोद कांबळीन तांकां योग्य सहकार्य करप तितलेंच गरजेचें आसा. पूण सभागे यु ट्युबकार ताका वयले वयर आपले व्हिवर्स आनी सबस्क्रायबर वाडोवपाक लागून विनोदाक आदीं घडिल्ल्या वायट घडणुकांची याद करून निदान ताचे मानसीक भलायके कडेन खेळप थांबोवचें अशें म्हाका सांगन दिसता.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
