भांगरभूंय | प्रतिनिधी
भांगरभूंय । प्रतिनिधी
पणजीः राज्यांत लोकसभा वेंचणुकेची तयारी चलिल्ल्यान कायदो आनी सुवेवस्थे खातीर पुलीस कर्मचार्यांक वेगवेगळ्या सुवातांनी कामाक दवोरल्यात. ताका लागून पुलीस स्टेशनांनी कर्मचाऱ्यांचो उणाव दिसून येता. अशें आसलें तरी दिल्लींत प्रशिक्षण पुराय करून आयिल्ल्या पुलीस उपनिरीक्षकांक अजून कामा विणे दवोरल्यात अशें सामकार आयलां.
राज्यांत पुलीस कर्मचाऱ्यांचो उणाव आशिल्ल्यान गोंय विधानसभा वेंचणुकेचे फांटभुंयेर पुलीस खात्यान हेर कर्मचाऱ्यां वांगडा पुलीस उपनिरिक्षकांची भरती करपा खातीर 28 मार्च 2021 दिसा जायरात दिल्ली. पुलीस खात्यान पुलीस उपनिरीक्षकांचीं 145 पदां भरपा खातीर अर्ज मागिल्ले. उपरांत 27 नोव्हेंबर 2021 दिसा लेखी परिक्षा घेतल्ली. पूण उमेदवारांक दिल्ल्या गुणा वयल्यान ती वादग्रस्त थारल्ली. 22 फेब्रुवारी 2022 दिसा तेन्नाचे प्रदेश काँग्रेस अध्यक्ष गिरीश चोडणकार हांणी मुख्य वेंचणूक अधिकारी आनी हेर यंत्रणे कडेन कागाळ करून उपनिरीक्षक भरती प्रक्रिया स्तगीत करपाची मागणी केल्ली. ते उपरांत उपअधिक्षकाचे येजमानके खाला समिती स्थापन करून चवकशी केली तेन्ना दोन उमेदवार शारीरिक चांचणेत अपेशी थारल्ल्याचें सामकार आयलें. पुलीस खात्यान पांच सुवातांनी घेतिल्ले शारीरिक चाचणेच्यो चित्रफितीची तपासणी करपा खातीर एक समिती स्थापन केल्ली. उपरांत पुलीस खात्यान 125 जांणी निवड करून तांकां 10 एप्रील 2023 दिसा प्रशिक्षणा खातीर दिल्लीतल्या पुलीस अकादमींत धाडल्लें. तांतूंत 112 दादले आनी 15 बायल उपनिरीक्षकांचो आसपाव आशिल्लो. ताचें प्रशिक्षण 22 मार्च 2024 दिसा पुराय जालें. उपरांत 30 मार्चाक तांका पुलीस सेवेंत दाखल करून घेतिल्लें. मात अजून ताचेंर जापसालदारी दिली ना आनी तांका कामां विणे दवरलां.
मजगतीं, बायल अत्याचारा कडेन संबंद आशिल्ल्या कागाळेचेर गुन्यांव दाखल करपा खातीर पुलीस स्टेशनांत बायल पुलीस निरीक्षकांची गरज आसता. पुलीस खात्यान फेब्रुवारी आनी मार्च म्हयन्यांत आदेश जारी करून पुलीस स्टेशनांत बायल निरीक्षकांची बदली केल्ली. अशें आसतनाय बायल उपनिरीक्षक सेवेंत रुजू जावचे पयलींच सुटयेर गेल्यात. ताका लागून कांय पुलीस स्टेशनांत बायल उपनिरीक्षकां सयत हेर कर्मचाऱ्याचो उणाव आसा. ताका लागून पुलीस स्टेशनांत जाय तो कर्मचारी वर्ग दिवपाचे मागणेन सध्या नेट धऱला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
