भांगरभूंय | प्रतिनिधी
हालींच दक्षीण आफ्रिका पंगडान भारताक हारोवन माळ 2-0 अशी जिखून वस्तादपण जोडलें तें लेगीत भारताच्या घरच्या मैदानार. खेळांत सदांच जैत आनी हार आसता. फाटले कितलेशेच म्हयने प्रशिक्षक गौतम गंभीर हाचे आड लॉबी काम करता. सोशल मिडियाचो वापर करून ताचे आड वेगळी प्रतिमा तयार करपाचो यत्न चालू आसाच, आनी आतां टॅस्ट माळ हारले उपरांत तांकां आनिकूय नेट चडला.
आमी चॅम्पियन्स ट्रॉफी आनी आशिया कप जिखलो तेन्ना प्रशिक्षक गंभीर आशिल्लो, तेन्ना कोणेंच ताची तोखणाय करूंक ना. उरफाटें आतां पंगड हारले उपरांत प्रशिक्षकाक खेपप समा न्हय. प्रशिक्षक मार्गदर्शन करता, पूण मैदानार खेळगड्यांक जैता खातीर फावो त्या खेळाचें प्रदर्शन करचें पडटा. तांच्या वायट कामगिरीक प्रशिक्षकाक जापसालदार धरप चुकीचें. समालोचक आनी आदले खेळगडे फक्त प्रसिध्दी खातीर, बेजबाबदार विधानां करतात अशें दिसता. तातूंतले कांय फकांडां करपी, टिप्पणीकार, स्वताच्या सुवार्था खातीर स्वताच्या लोकांक हाताळपाचो यत्न करपी, हें सगलें तांच्या एकंदर वागणुकेंतल्यान स्पश्ट जाता.
क्रिकेटीच्या जिविताचेर गिरेस्त जाल्ली आनी दिसान दीस गिरेस्त जायत वचपी बीसीसीआय ही पयश्यांची खाण. मुंबय क्रिकेट नियंत्रण मंडळांत, हेर राज्य मंडळांत आनी सगल्यांत म्हत्वाचें म्हणल्यार बीसीसीआयंत पद मेळोवपा खातीर राजकारणी आनी हेर व्हडल्या लोकां मदीं सदांच चडा-ओड कित्याक आसता? हाची जाप सगल्यांक खबर आसा. क्रिकेट आतां पयश्यांचो खेळ जाला. सगल्यांचे दोळे बीसीसीआयच्या गल्ल्याचेर आसतात. एकदां ह्या मळार भितर सरलो म्हणटकच सगले हात धुवून घेतात. ‘आदर्श खेळगडो’ सारकिल्लीं उतरां अप्रासंगीक जाल्यांत, कारण आदर्श लोक जांकां खेळगडो मानतात तेच गुटखा जायरातींनी काम करून बोल्सां अदीक भरपाचे सर्तींत आसात.
संवसारीक करंड जिखले उपरांत भारतीय खेळगड्यांक मुंबयंत भव्य येवकार दिलो, तांची मिरवणूक काडली, त्या वेळार भौसान केल्ली गर्दी भिरांकूळ आनी अनियंत्रीत आशिल्ली. कितेंय चुकलें जाल्यार कितें जावपाचें तें उतरांनी सांगूंक कुस्तार. जैताचें कारण दिवन आरसीबीन आयपीएल जिखले उपरांत सुवाळ्याचें आयोजन केल्लें तेन्ना जाल्लीं अपघाती मरणां लोकांचें यादींत ताजीं आशिल्लीं. देखून सुदैवान वायट कांयच घडलें ना. खेळगडे गिरेस्त जाल्यात, पूण जमिल्ल्या लोकांचें कितें? ते तशेंच उरतलें.
आतां क्रिकेट खेळगडे हे खेळगडे न्हय तर सेलिब्रिटी जाल्यात. क्रिकेट हो ग्लॅमर्सांचो खेळ जाला. गर्दी, खेळगडे न्हय तर सेलिब्रिटींक पळोवपा खातीर करतात. ही जिवघेणी गर्दी म्हळ्यार निकटें मूर्खपण. प्रसार माध्यमां, कांय समालोचक, आदले क्रिकेट खेळगडे आदीं अप्रत्यक्षपणान खेळगड्याची कारकीर्द केन्ना सोंपोवची हें थारावपा खातीर तांचीय एक लॉबी वावुरता.
थोड्याच उतरांनी सांगचें म्हळ्यार क्रिकेट खेळाचें पुराय वेवसायीकरण जाल्लें दिसता. आतां दुर्दैवान खेळां परस पयश्यांक चड म्हत्व आयलां. खेळटना पळोवपाक अशी एकंदर शिस्त, समर्पण आनी शालीनताय खूब उण्या खेळगड्यांक आसता. ते हेर खेळगड्यांचें खरे आदर्श. कांय आदर्श घेवपा सारके खेळगडे पयश्यां खातीर स्वताक विकून मेकळे जाल्यात. देखून खेळां मोगींचे नदरेंतल्यान ते पुरायपणान भायर पडल्यात. ही म्हजी एकूणच खेळाचेर वैयक्तीक टिप्पणी, आनी हारपाचें तर्क सगल्यांक आवडले नासुये.
पूण हारीचें खांपर कोणाच्या माथ्यार फोडपाक फावना. हो सांघीक खेळ. खेळां मैदानार खेळगड्यांनी खेळप आसता, प्रशिक्षकान न्हय. प्रशिक्षक बरो मार्गदर्शन दिवंक शकता. खेळाच्यो बारीकसाणी सांगूंक शकता. पूण खेळगड्यांनी फावो ती कृती करची.
ह्या ग्लॅमर्स आयपीएलान जायत्या तरणाट्या खेळगड्यांक झळकवपाची संद मेळ्ळी. कांय जाणांक ल्हान पिरायेचेर कोट्यांनी रुपया, नामना, जायरातींनी घेतिल्ल्यान जाल्यार कांय जाणांक प्रसार माध्यमांनी आनी समिक्षकांनी नामना दिल्ली. आतां क्रिकेट मैदानार आनी मैदानाचे भायर पयशेच म्हत्वाचे. जशें कांय पालक रियालिटी शो पळोवन आपल्या भुरग्यांक अक्षरशा कांय वाठारांनी धुकलतात तशें आमी पळयतात, तशें क्रिकेट अकादेमींनी तांकां धुकलतात तेंवूय पळयतात. प्रतिभावान आशिल्ले मुखार येतलेच. पूण कांय जाणांकय कश्टांक तोंड दिवचें पडटा. कितेंय आसूं. शिक्षण आनी संस्कृताय ही करियराची बुन्याद, तांकां घटमूट जावपाची गरज आसा. सचीन तेंडुलकर सगलेच जावंक शकनात हें लक्षांत दवरचें पडटलें. अती थंय माती हें लक्षांत दवरून पयश्यांची गरज आसा पूण ताचो गैरवापर करप टाळप.
तरणाट्या क्रिकेट खेळगड्यांची पांचनखेत्रांची जीण तांकां आपलीं मुल्यां विसरूंक लायतात. पूण तांचे भितर सत्तरीच्या दसकांतली उच्च दर्ज्याची क्रिकेट आयज दिसून येना हें मात खरें.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
