भांगरभूंय | प्रतिनिधी
गोंयांतली सध्याची परिस्थिती ‘उजो लागला एके कडेन, फायर ब्रिगेड धांवता दुसरे कडेन’ अशी जाल्या. समस्या एके कडेन आनी उपाय मात भलतेच कडेन, असो अंधेर नगरी कारभार चालू आसा. राज्य सरकारान अशें एकूय खातें ना, जंय लोकांच्यो कागाळी ना. प्रशासन नांवाची वेवस्था पुराय कोसळ्ळ्या. राज्या भायल्यान येवपी उच्च अधिकारी कांयच काम नाशिल्ले सारके सायड बिझनेसात दंग आसात. कोण रियल इस्टेट एजंट तर कोण ब्रोकर जाला. कोण आपल्याच खात्याक कशें लुटपाक मेळटलें, हे खातीर नव्यो – नव्यो युक्त्यो सोदपाक लागला. वरिश्ठ पांवड्याचेर सगली अंधाधुंदी चालू आशिल्ल्यान ताची अनुकरण दुसरे, तिसरे पातळे वयलो नोकरदार करपाक लागला.
वशिल्या बगर कामां जायनात. सरकारी नोकरी मेळोवपाक जाय जाल्यार ते खातीरुय पयशां बगर कामां जायनात. विरोधक तर उक्तेपणी आरोप करपाक लागल्यात. लोकांचो हो छळ उणो म्हणून काय नकळो, साधन सुविधा निर्माण करपाच्या कामांत भ्रश्टाचार चलता.
रस्ते, पूल, इमारती हांगाच्या कामाचो दर्जो सामको वायट आसा. डांबरीकरण केल्ल्या रस्त्याचें म्हयन्या भितर भयो भयो जातात. पणजे स्मार्ट सिटीच्या नांवान चलिल्लीं कामां दिश्टीहिनांकूय जाणवतलीं, इतलीं निकृश्ट आसात. पणजे शारातले रस्ते, फुटपाथ, राखणे वण्टी हीं कामां पळयल्यार णवशे कोटी रुपया गेले खंय असो प्रस्न पडटा.
एक कोटी रुपया मोलाचो सीसीटीव्ही कॅमेरो गोंयांतूच आसपाक शकता. थोडक्यांत गोंयकार आतां इतली सोंशीक जाल्यात की दिसा उजवाडीं चालू आशिल्ली ही लुटमार पळोवन ती शांत आसा. हें सगलें हे परशुराम भुंयेक खंय व्हरतलें काय?
– गजानन बा. नायक भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
