भांगरभूंय | प्रतिनिधी
पणजी : अभिनेत्री प्रशांती तळपणकार हांणी टोरोंटोंत (उत्तर अमेरिका) जाल्ल्या 14 व्या आंतरराष्ट्रीय दक्षीण आशियाई चित्रपट महोत्सवांत (इफ्सा) आंतरराष्ट्रीय श्रेणींत ‘सर्वोत्तम अभिनेत्री’चो पुरस्कार जिखलो. 9 ते 19 ऑक्टोबर मजगतीं जाल्ल्या ह्या महोत्सवांत 22 भासांतल्यान १२० चित्रपट प्रदर्शीत केल्ले. हातूंत व्हड चित्रपट, लघुपट आनी म्हायती पटांचो आसपाव आशिल्लो.
तळपणकार हांकां हो सन्मान मांगिरीश बांदोडकार दिग्दर्शित ‘आसेसांव’ ह्या 30 मिनटांच्या कोंकणी लघुपटांतले भुमिके खातीर भेटयला.
प्रशांती हांणी अंतर्मनांतलो संघर्श आनी असुरक्षिततायेक तोंड दिवपी बायलेचें भावविश्व परिणामकारकतेन साकारलां. ती एका साध्या पात्राक खोलाय आनी मनशाच्या भावनांची गुंतागुंत दितना ह्या चित्रपटांत दिसता. एकटेपणां, जिज्ञासा आनी मानवी नात्यांच्या सोदाचो हो अभिनय तांच्या सुक्ष्म निरीक्षणशक्ती आनी पात्रांच्या अंतरंगावेलें प्रभुत्व दाखयता, अशें इफ्सान म्हणलां.
चित्रपट आनी नाट्य ह्या दोनूय मळांचेर प्रशांती हें गोंयचें एक म्हत्वाचें व्यक्तीमत्व जावन आसा. तांणी कोंकणी, मराठी, हिंदी आनी इंग्लीश भाशेंतले खुबशे चित्रपट आनी नाटकांनी आपले अभिनय कुशळटायेचें दर्शन घडयलां.
हातूंत ‘पलतडचो मुनीस’ (कोंकणी) हो आंतरराष्ट्रीय पांवड्यार भोवमान केल्लो चित्रपट आनी ‘कभी पास कभी फेल’ (हिंदी), ‘अलीशा’ (कोंकणी), ‘आमोरी’ (कोंकणी), ‘बागा बीच’ (कोंकणी) ह्या राष्ट्रीय पुरस्कार जैतिवंत चित्रपटांचो आसपाव आसा. तशेंच ‘जुजे’ (कोंकणी) ह्या चित्रपटांतली सहाय्यक अभिनेत्रीचो पुरस्कार तांणी गोंय चित्रपट महोत्सवांत मेळयिल्लो. अभिनया वांगडाच, निवृत्त शिक्षिका आशिल्ली प्रशांतीची लेखिका, स्तंभलेखिका, पटकथालेखिका, दिग्दर्शिका आनी समाजकार्यकर्ती म्हणून वळख आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
