भांगरभूंय | प्रतिनिधी
आयज कर्नाटकांत करतले पळोवणी
भांगरभूंय । प्रतिनिधी
दिवचलः म्हादय प्रवाह पंगडाचे पीएम स्कॉट हांच्या फुडारपणा खाला गोंय, महाराष्ट्र आनी कर्नाटकांतले वांगडी आनी अधिकाऱ्यांनी विर्डी धरण तशेंच हेर सुवातांचेर भेट दिवन पळोवणी केली.
महाराष्ट्रान केंद्राची वा गोंय सरकाराची कसलीच परवानगी घे नासतना, दोडामार्ग विर्डीच्या कट्टिका नाला धरणाचें काम सुरू केलां आनी सुमार 80 टक्के काम पुराय केलां. कट्टिका नाला ही महाराष्ट्राच्या पश्चीम घाटांत उगम जावपी उपन्हंय आसा, ती विर्डीच्या व्ल्वंटाक मेळटा. महाराष्ट्रांतल्लया दोडामार्ग म्हालांतल्या गांवां खातीर पियेवपाचें, शिंपणावळीचें उदक आनी उदकाच्यो हेर गरजो पुराय करपाच्या उद्देशान व्हाळवाट न्हंयेक मेळचे आदींच महाराष्ट्रान धरणाचें काम सुरू केलां.
महाराष्ट्राचे उदकास्रोत अधिकारी विजय कुमार थोरात हांणी धरणाचे सुवाते वयले बांद आनी घुंवडावपाचे येवजण्यांच्यो प्रस्तावांच्यो गरजो स्पश्ट केल्यो.
कट्टिका नाला धरणा भायर पंगडान मोराची राय, धनगरवाडी आनी हलतारा नाला थळांक भेट दिली जी विर्डी धरण आनी वळण येवजणेच्या कामां खातीर प्रस्तावीत आसात. खात्रेच्या सुत्रांनी दिल्ले म्हायती प्रमाण कर्नाटक सरकार म्हादय- प्रवाहाची कणकुंबी, चोर्लाच्या कळसा प्रकल्पी सुवात आनी नेरसेच्या चापोली आनी भांडुराच्या जलविद्यूत प्रकल्पाच्या प्रस्तावीत थळांक दिवपा आशिल्ली भेट फुडें धुकलचे खातीर वा रद्द करचे खातीर सगळे तरेचे यत्न करतात. सध्या कर्नाटकांतल्या म्हादय देंगणांत उटंगराचो पावस पडटा. तशेंच कर्नाटकांतल्या विवीध संघटणांनी 7 जुलय 2024 ह्या दिसा निश्चीत केल्ल्या प्रवाह पंगडाक तपासणे खातीर परवानगी दिवची न्हय हे खातीर सिद्धरामय्या सरकाराचेर चेपण हाडटा अशें सुत्रांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
