भांगरभूंय | प्रतिनिधी
गुन्यांव नोंद; दाबोळी विमानतळा वयलो प्रकार
भांगरभूंय । प्रतिनिधी
म्हापशें: दाबोळी विमानतळाचेर गोंय ते हैदराबाद प्रवास करपी इंडिगो विमानाच्या आपत्कालीन दाराचें हॅण्ड घाळपणान एका प्रवाशान ओडलें. ताका लागून कर्मचारी आनी 179 प्रवाशांच्या जिवाक धोको निर्माण केल्ल्याच्या आरोपा खाला प्रवासी विशाल शांदील सिंग (हिमाचल प्रदेश) हाचे आड विमानतळ पुलीस स्टेशनाचेर गुन्यांव नोंद केला.
ही घडणूक शुक्रारा रातच्या 12.41 वरांच्या सुमाराक घडली. विमानतळा वयल्यान इंडिगो एरलायन्साचें नं. 6 ई-724 हें गोंय- हैदराबाद मार्गाचेर उड्डाण करपाचे तयारेंत आशिल्लें. ह्या वेळार दुबावीत प्रवाशान आपल्या सिटाच्या विंगा वयलें आवरण घाळपणान ओंडलें आनी आणिबाणीच्या दाराचें नियंत्रण हँडल खाला ओडलें. ताका लागून विमानाचें उड्डाण तात्पुरतें खंडीत करचें पडलें.
ह्या विमानांत 179 प्रवासी आशिल्लें. दुबाविताच्या ह्या घाळपणाक लागून विमानांतले प्रवासी आनी कर्मचाऱ्यांच्या जिवाक धोको निर्माण जालो. ह्या प्रकरणांत दाबोळी विमानतळाचे सुरक्षा इंटरग्लोब एव्हिएशन लिमिटेडाचे सहाय्यक वेवस्थापक शाहनवा शेख हांणी केल्ले कागाळेच्या आदारान पुलिसांनी दुबावीत प्रवाशा आड गुन्यांव नोंद केला. फुडलो तपास सहाय्यक पुलीस उपनिरिक्षक संतोष गांवकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
