भांगरभूंय | प्रतिनिधी
आखाडा परिशदेच्या महंताची मागणी
प्रयागराज, खबरां संस्था : हांगा १३ जानेवारीच्यान सुरु जावपी महाकुंभ मेळ्यांत बिगरहिंदूंक दुकानां घालपाक दिवची न्हय, अशी मागणी अखील भारतीय आखाडा परिशदेचे महंत रवींद्र पुरी हांणी केल्या. आमकां महाकुंभ नितळ, पवित्र आनी शांतीकायेन जाल्लो जाय. ताका लागून सुरक्षा आनी पवित्रतायेचे नदरेन ‘तांकां’ महाकुंभा पसून पयस दवरूंक जाय, अशें तांणी सांगलें.
च्याचे गाडे, ज्युस स्टाॅल, फुलांचीं दुकानां बिगर हिंदूंक दिवपाक जायनात. जर तांकां तीं दिलीं जाल्यार ते थुंकतले, मुत्तले आनी मागीर आमच्या नागा साधूंक कारवाय करपाक मनांत नासतना बळयां मुखार येवचें पडटलें. जर अशें जालें, कोण जखमी जालो जाल्यार ताचो संवसारभर देश, धर्मा विशीं चुकीचो संदेश वतलो. आमच्यो जात्रा, मेळे सुंदर, नितळ, भव्य, पवित्र आनी शांततेंत जावंक जाय. ताका लागून बिगर हिंदूंक पयस दवरूंक जाय, अशें पुरी हांणी आयएएनएस हे खबरां संस्थेक सांगलें.
हालींच ‘मन की बात’ कार्यावळींत प्रधानमंत्री नरेंद्र मोदी हांणी, देशांत एकचार आनी भावपण राखात. समाजांतली भेदभाव, दुस्वासाची भावनां नश्ट करपाक वावरात, असो उलो मारिल्लो. जात्रा, काले, कुंभमेळे हे आमच्या देशाची विविधताय दाखयतात. जंय केन्नाच कोणा आड भेदभाव जायना. सगल्यांक समान वागणूक मेळटा. कुंभमेळ्याचें खाशेलेंपण म्हणल्यार थंयचें वैविध्य. लाखांनी संत, शेंकड्यांनी परंपरा, पंथ, आखाडे… ह्या मेळ्याचे वांटो जातात. कोणूच ल्हान, व्हडलो नासता. भेदभाव तर मात्तूय जायना. संवसारांत विविधतायेचें अशें दर्शन खंयच घडना, अशेंय मोदी हांणी सांगिल्लें.
मजगतीं, महाकुंभ मेळा १३ जानेवारीक सुरु जातलो. वातावरण नितळ उरचें म्हूण प्रशासन यत्न करता. अत्याधुनिक साधन सुविधा, उपकरणाचो वापर करून सगल्यांक बरो अणभव मेळटलो, हे खातीर यत्न चल्ल्यात.
मुस्लीम जमातीचो विरोध
अ. भा. मुस्लीम जमातीन अ. भा. आखाडा परिशदेच्या ह्या प्रस्तावाक विरोध केला. तशें करीत जाल्यार समाजांत फूट पडटली, अशें तांचें म्हणणें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
