भांगरभूंय | प्रतिनिधी
प्रयागराज, खबरां संस्था : उत्तर प्रदेशाचे मुख्यमंत्री योगी आदित्यनाथ हांणी आयज प्रयागराजांतल्या सर्किट हावस महाकुंभ 2025 खातीर समर्पीत केल्ल्या आकाशवाणीच्या ‘कुंभवाणी’ (103.5 मेगाहर्ट्झ) ह्या खाशेल्या एफएम चॅनलाचें उक्तावण केलें. ह्या इतिहासीक प्रसंगाचेर केंद्रीय म्हायती आनी प्रसारण राज्यमंत्री डॉ. एल. मुरुगन हांणी ह्या कार्यावळींत वांटो घेतलो. ह्या वेळार मुख्यमंत्री आदित्यनाथ हांणी कुंभमंगल धवनाचें उक्तावण केलें.
योगी आदित्यनाथ हांणी कुंभवाणी चॅनल सुरू करपा खातीर प्रधानमंत्री नरेंद्र मोदी आनी म्हायती आनी प्रसारण मंत्रालयाचे उपकार मानले.
कुंभवाणीचेर कुंभमेळांतल्या कार्यावळींचे दर दिसा थेट प्रक्षेपण जातलें. तेच बरोबर सांस्कृतीक दायजाचेर खाशेलें सादरीकरण आसतलें. तशेंच ‘शिव महिमा’ माळेचें प्रसारण जातलें आनी भारतीय संस्कृतीक दायजाचेर आदारिल्लो खाशेल्यो कार्यावळी जातल्यो ज्यो कुंभवाणीचेर थेट प्रक्षेपणा वरवीं दाखयतलें.
कुंभमेळ्यात वांटो घेवपाक प्रयागराजाक येवंक शकले नात तांकां कुंभवाणीचेर जावपी थेट प्रक्षेपण उपेगी पडटलें. तशेंच ताचे वरवीं ह्या इतिहासीक महाकुंभाचें दर्शन पुराय देशांत आनी संवसारांत पातळावप खातीर उपेगी थारतलें. देशाची भौशीक प्रसारण सेवा प्रसार भारती हाचो हो उपक्रम भारतांतली श्रद्धेची इतिहासीक परंपरा चालू दवरतलोच तेच बरोबर भक्तांक घरांतल्यानच कुंभमेळ्या विशीं म्हत्वाची म्हायती मेळटली, आनी सांस्कृतीक वातावरणाचो अणभव घेवंक मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
