प्रयांक, दृषा बुद्दीबळ सर्तींत जैतिवंत

भांगरभूंय | प्रतिनिधी

राज्य पांवड्या वयले अखील गोंय 7 वर्सां पिराये सकयले बुद्दीबळ सर्तींत उक्त्या गटांत साश्टी तालुक्याच्या प्रयांक गांवकारान जाल्यार चलयांच्या गटांत मुरगांवचे दृषा घोंगे हिणें वस्तादपण जोडलें. सर्त फातोड्डेंच्या पंडीत जवाहरलाल नेहरू स्टेडियमाचेर जाली.

सालसेत तालुका चेस असोसिएशनान गोवा चेस असोसिएशनाच्या मान्यतायेन सर्त आयोजीत केल्ली. प्रयांकान निमाणे फेरयेंत इव्हान तेलिसाक हारयलो. ताणें सर्तींत एक लेगीत हार घेनासतना साडेपांच गूण केले. चलयांचे गटांत जैतिवंत थारिल्ली दृषा हिणें लेगीत एकूय मॅच हारूंक ना. तिणें पांच गुणांची कमाय केली.

उक्त्या गटांत इव्हान तेलिस उप वस्ताद थारलो. नारायण (आरव) प्रभुदेसाय, सार्थक नायक, रोनेल फर्नांडीस, स्कायलर फर्नांडीस हांकां वळेरेन तिसरी ते सवी सुवात फावो जाली.

चलयांच्या गटांत वानिया दुकळे हिका दुसरी सुवात फावो जाली. शनाया देसाय, तृषा पटेकार, सान्वी देसाय, सिदोनिया दा कुन्हा हांकां वळेरेन तिसरी ते सवी सुवात फावो जाली.

इनामां भेटवण सुवाळ्याक पुलीस अधिकारी देऊ माणगांवकार, गोवा चेस असोसिएशनाचे सचीव आशेष केणी, सालसेत तालुका चेस असोसिएशनाचे उपाध्यक्ष दामोदर जांबावली, भांडारी दिलीप वेर्णेंकार उपस्थीत आशिल्ले.

आशेष केणी सर्तीचे मुखेल आर्बिटर आशिल्ले. ताका ज्योत्स्ना सारिपल्ली, आशा शिरोडकार, रिदिकेश वेर्णेंकार हांचो आदार लाबलो.