भांगरभूंय | प्रतिनिधी
पणजी: फाटल्या कितल्याशाच दिसां सावन उदकाचे पुरवणेचे गंभीर समस्येक तोंड दिवपी ’प्रभू व्हायोलेटा’ ह्या दाबोळच्या नागरिकांनी आयज सरळ भलायकी सचिवांची भेट घेवन आपली तिडक उक्तायली. सेगीत कागाळ करूनय संबंदीय प्राधिकरणांकडल्यान हे समस्ये कडेन आडनदर जाल्ल्यान आतां हांगचे नागरीक उबगल्यात.
नागरिकांनी दिल्ले म्हायती प्रमाण तांणी हाचेर उदका पुरवण आनी भलायकी विभागा कडेन संबंदीत सगल्या अधिकार्यांची भेट घेतिल्ली. मात, आजूनय ह्या दुशीत उदकाचे समस्येचेर कसलेच तरेचो कायमचो तोडगो काडूंक ना. दुशीत उदकाक लागून भलायकेचो गंभीर प्रस्न निर्माण जावपाचो भंय नागरिकांनी भलायकी सचिवां मुखार उक्तायलो.
आयचे भेट मजगतीं भलायकी सचिवां वांगडा सविस्तर आनी गरजेची चर्चा जाली. ह्या प्रकरणाची गंभीर दखल घेवन भलायकी सचिवांनी येवपी सोमारा संबंदीत सगल्या विभागांच्या अधिकार्यांची बसका आपयल्या. तशेंच ह्या प्रकरणाकडेन आडनदर करपी सगल्या संंबंदीत प्राधिकरणांक कारणां दाखयात नोटीस जारी करपाचे निर्देशूय तांणी दिल्यात.
प्रभू व्हायोलेटा इमारतीच्या रहिवाशांनी प्रशासनाच्या ह्या सकारात्मक प्रतिसादा विशीं समाधान जरी उक्तायलां तरी सोमारा जावपी बसकेंतल्यान प्रत्यक्ष कृती आनी नितळ उदकाचें आस्वासन मेळटलें अशी अपेक्षा उक्तायल्या. जर हे बसकेंत ठोस निर्णय जावंक ना जाल्यार फुडलें पावल उखलपाची शिटकावणीय नागरिकांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
