भांगरभूंय | प्रतिनिधी
दुशीत उदका पुरवण प्रकरणांत मंत्री विश्वजीत राणे हांची कारवाय
पणजीः वादग्रस्त प्रभू व्हायोलेटाचे बिल्डर अमीत प्रभू हांचे सगले बांदकाम प्रकल्प स्थगीत दवरल्यात. ह्या विशयाची खोलायेन चवकशी जातली, आनी जर हो बिल्डर ह्यो गजाली जाग्यार घालिना जाल्यार ताचेर ख्यास्तीची कारवाय जातली, अशी शिटकावणी नगर नियोजन मंत्री विश्वजीत राणे हांणी दिली.
दाबोळे हांगासरले प्रभू व्हायोलेटा दुशीत उदक पुरवण जावन सुमार 200 रहिवाशी दुयेंत पडिल्ल्याची गंभीर दखल घेतिल्ल्याचें मंत्री राणे हांणी परवरे एके कार्यावळी उपरांत पत्रकारां कडेन उलयतना सांगलें.
अमीत प्रभू हांचे सगले बांदकाम प्रकल्प स्थगीत दवरपाचे निदेश नगर नियोजन खात्याक दिल्यात. सद्या प्रभू हे गायब जाल्यात. प्रभू ह्या विशयाचेर लोकां कडेन लक्ष दिनात अशें लोकय म्हज कडेन उलयल्यात. ही समस्या जाग्यार घालप तांची जापसालदारकी आसा. नगर नियोजन खात्या कडल्यान ताच्यो सगल्यो फायली मागयल्यात. जर हो विशय प्रभू सुटावो करिना जाल्यार हे प्रकल्प स्थगीत दवरून ते रद्द करतले. लोकांच्या जिवा कडेन खेळपाचो कोणाकूच अधिकार दिवंक ना, अशी शिटकावणी राणे हांणी दिली.
हे विशीं हांवें भलायकी सचिवांक निदेश दिवन एक समिती तयार करून तातूंत अन्न आनी वखदां प्रशासन, भलायकी संचालनालय, नगर नियोजन खातें हांकां आस्पावन घेवपाक सांगलां. अशे तरेच्यो घडणुक्यो कित्याक लागून जातात हाचे फाटले कारण सोदपा खातीर ही समिती अधिसुचीत करतली. तशेंच पिडीत लोकांक बसकेंत आपोवन तांचे विचार कितें आसात ते आयकून घेवपाची तांकां संद दिवपाक सांगलां. जे दुयेंती आसात ते सद्या बरे जाल्यात आनी सद्या कसलोच विशय ना, अशें स्पश्टीकरण राणे हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
