भांगरभूंय | प्रतिनिधी
गोंयांत वाडत आशिल्ली ही गर्दी राज्याक फुडाराक झेपतली काय ना, हाचो विचार करपाची खरी गरज आसा. तो विचार कोणे आनी केन्ना करपाचो होच कितें तो प्रस्न आसा.
गोंयचे जांवय, आदले केंद्रीय मंत्री सुरेश प्रभू हांणी पणजे एके कार्यावळींत उलयतना एक शिटकावणी दिली. गोंयांत वाडत चलिल्ली परप्रांतीयांची गर्दी पळयतां भायल्यांक सोंसपाची राज्याक तांक आसा काय ना तें तपासून पळोवपाची गरज आसा, अशें तांणी सांगलें. तांची ही शिटकावणी आमच्या राजकी फुडाऱ्यांनी कितलो गंभीरपणान घेतला, ताची कल्पना ना. पूण, ‘गोंय, गोंयकार, गोंयकारपण’ जगपी सामान्य भौसान आपल्यो जमनी विकतना ती शिटकावणी लक्षांत दवरपाची केन्ना न्हय इतली गरज आसा. गोंयांतले पंच, नगरसेवक, जिल्हो पंचायत वांगडी, आमदार, खासदारांनीय सुरेश प्रभून जें कितें सांगलां ताचेर विचार करपाक जाय.
रोजगारा खातीर राज्या भायर, आखाती देशांत, युरोप, अमेरिकेंत वचपाची परंपरा पयलीं सावन आसा. जीं कामां करपाक गोंयकार विदेशांत वतात, तींच कामां करपाक परप्रांतीय गोंयांत येतात. उत्तर भारतांतल्या जायत्या गरिबां खातीर गोंय म्हणल्यार दुबय. हांगा येवन कश्ट करून रावपाक कोणाची हरकत नाशिल्ली, आयजूय ना. पूण आयज गांवांत जें घडटा तें पळयत जाल्यार गोंय गुन्यांवकारी राज्य जातलें काय अशी भिरांत दिसपाक लागल्या.
आपापल्यो वोटबँको सुगूर दवरपाक राजकारण्यांनी हांगा झोपडपट्ट्यो वसोवपाक सुरवात केली. ताचे फाटोफाट बेकायदेशीर कावलां अड्डे तयार जाले. आतां पेडणें सावन काणकोण मेरेन दर्यादेग वाठारांत, रानांनी पसून दुबाव घेवपा सारके धंदे आशिल्ल्या पयशेकारांचे आलिशान बंगले, फार्म हावसां उबीं रावपाक लागल्यांत. दिल्ली, मुंबयंतले जायते गुन्यांवकारी प्रवृत्तीचे लोक शांतताप्रिय गोंयांत येवन हांगाचें वातावरण इबाडपाक लागल्यात. अशा लोकांक वेळारुच आडावपाची गरज आसा.
गोंयांत वाडत आशिल्ली ही गर्दी राज्याक फुडाराक झेपतली काय ना, हाचो विचार करपाची खरी गरज आसा. तो विचार कोणे आनी केन्ना करपाचो होच कितें तो प्रस्न आसा.
– गजानन बा. नायक भाटकार
आल्त पर्वरी (बार्देश)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
