भांगरभूंय | प्रतिनिधी
करियर करताना आपूण वेवसायिक जातलो काय खंय तरी नोकरी करतलों, हाचो अदमास आसना, पूण एक मात खरें की तुमकां नोकरी करची आसूं वा नासूं, एक गजाल तुमी चुकोवप शक्य ना, ती म्हळ्यार मुलाखत दिवप. हातून फक्त प्रस्नांची जाप दिवप अपेक्षित नासता, तर ती प्रभावी आनी खरी दिसपाक जाय. हांचे खातीर खाशेलें प्रशिक्षण लेगीत घेवंक मेळटा. हेर अभ्यास करताना मुलाखतींचेर तसो चड विचार जाताच, अशें ना. आयच्या लेखांत आमी प्रभावी मुलाखती खातीर कितें करपाचे? हांचो विचार करूया. कित्याक तर हातांत व्हड शिक्षणाची पदवी आसून उपेग ना, तर तुमी कशे उलोवंक शकतात, तुमका सामान्य ज्ञान कितलें आसा, हें पॅनलाचे वांगडी पळयतात. आतांच्या स्मार्ट काळान मुलाखतीचें तंत्र आमी जाणून घेवप गरजेचें.
जे संस्थेच्या ना जाल्यार कंपनीच्या सुवातीचेर तुमी मुलाखतीक वतात, तेन्ना हें समजून घेवपाक जाय की कोणायकुय ते घेवचे नात, तशेंच जे घेतले ते पारखुनूच घेतले. तेन्ना प्रस्न विचारताना ते विचार करूनच विचारतले. आपणे लेगीत ताची जाप विचार करुनूच दिवपाक जाय. तुमी जेन्ना मुलाखत दिवपाक कॅबिनांत वतात, तेन्ना परवानगी घेवपाक विसरू नाकात, आनी भितर बसपाक सांगिनात तो मेरेन उबेंच रावप योग्य. मुलाखतीक तुमी सांगिल्ल्या वेळा पयलीं पावात. जेणेकरून तुमचेर कसलोच तणाव येवचोना. त्या दिसा जे कपडे घालतले ते भडक आसूंक जायनात, चल्यांनी वेवस्थित खाड करून वचूंक जाय. खाड दवरलां जाल्यार तें वेवस्थित ट्रिम करून वचात.
जे कंपनींत तुमी मुलाखत दिवपाक वतले, तिची माहिती तुमचे लागीं आसपाक जाय. म्हळ्यार गृहपाठ हो जायच. आतां हें काम सामकें सोंपें जालां. कशें काय म्हणशात? प्रत्येक संस्थेचें/ कंपनीचें संकेतस्थळ आसता. ताका भेट दिशात तर बरीच म्हायती तुमकां मेळूं शकता. हांचे उपरांत तुमी जीं कागदपत्रां व्हरतले तातूंन भितर तुमी जी पदवी घेतल्या, ती तर जायच; खेरीज तुमी समजा एखादे सर्तींन वांटेकार जाल्यात आनी तुमकां बक्षीस मेळ्ळां तर ताची सर्टिफिकेट्स वांगडा जाय. हीं सगलीं कागदां वेवस्थित एके फायलीन दवरुन ती वांगडा घेवंक जाय. हीं कागदां तुमी कशीं सांबाळटात हाचेरूय तुमचे मुलाखतीचो फुडार अवलंबून आसूं येता. म्हाका खबर आसा, एका विद्यार्थ्या कडे प्राथमिक ते पदव्युत्तर मेरेनची सर्टिफिकेट्स, मार्कशीट हें सगलें वेवस्थित आसलें. नोकरी मेळोवपाक ताका ह्या गुणाचोय
फायदो जालो.
वैयक्तिक म्हायती वा रेस्युमी आमी दितात, तो आकर्षक आसपाकच जाय. तातूंत दिल्ली म्हायतीय खरी आसपाक जाय. ना जाल्यार मुलाखत घेवपी तुमकां प्रस्न विचारूं शकता आनी ताची जाप जर तुमी चुकीची दिली तर लुकसाण तुमकांच जातलें. तुमचो छंद म्हूण जें कितें करतात, तें सांगात. देखीक तुमी खऱ्यांनीच वाचतात जाल्यार तुमकां, कितें वाचला? हालीं कितें वाचलां? अशें विचारू शकता. तेन्ना हांचेर तुमी गंभीरतायेन विचार करचो. जर तुमचे कडेन सांग सारकें ना जाल्यार वाचनाचो उल्लेख करू नाकात. कंपनी नाजाल्यार संस्था हांकां आव्हानां आसतातूच, ताका जाप दितना म्हाका आव्हानां आवडटात आनी सहकाऱ्याच्या सांगातान हांव ती पयस करपाचो यत्न करतलों, अशें तुमी म्हणू येता. बरेच फावट आमका कोणूय चुकत तर राग येता आनी ते सभाविक, पूण मुलाखतींत तुमी सांगू शकतात की म्हाका राग येता, पूण हांचेर नियंत्रण दवरपाक हांव योग, अध्यात्म
शिकतां.
यु ट्यूबाचेर तुमी सोदशात जाल्यार, प्रभावी मुलाखत कशी दिवपाची हांचेर जायते व्हिडियो मेळूं शकतात. पूण फक्त आयकून जायना, ताचो सराव करचो पट्टा. तो तुमी आरशा फुडें रावन करूं शकतात. मोबायलाचे मजतीन रेकॉर्डिंग करूं शकतात. आपली मुलाखत हयकारात्मक सोंपतली हाची काळजी तुमी घेवपाक जाय. मुलाखत सोंपली की सगल्यांचे आभार मानून भायर वचपाक विसरूं नाकात. अशो जायत्यो गजाली मुलाखती वेळार तुमी सांबाळपाच्यो आसतात. हो भाग आमच्या अभ्यासक्रमांत आसताच, अशें ना. म्हूण ताची तयारी आदीं पासुनच करपाक जाय.
प्रा. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
