भांगरभूंय | प्रतिनिधी
रेल्वे खात्या खातीर दोन हजारां परस चड प्रकल्प
नवी दिल्ली, खबरां संस्था ः भारतीय रेल्वे खात्या खातीर आयचो इतिहासीक दीस थारलो. प्रधानमंत्री नरेंद्र मोदी हांणी आयज 41 हजार कोटींच्या प्रकल्पांची घोशणा केल्या. मोदी हांणी फकत रेल्वे खात्या खातीर दोन हजारां परस चड प्रकल्प हाडल्यात. अमृत भारत स्टेशन येवजणे खाला 553 स्टेशनां परतून बांदपाचे आसात. तशेंच हे सगळे प्रकल्प आमी देशाक समर्पित करतात अशेंय मोदी हांणी सांगलें.
मोदी हांच्या आयच्या ह्या निर्णयाक लागून देशांतल्या 27 राज्यांतल्या 553 रेल्वे स्टेशनांचें रुपांतर जातलें. मोदी हांणी ऑनलायन पत्रकार परिशद घेवन वेगवेगळ्या प्रकल्प आनी येवजण्यांचें उक्तावण केलें. ह्या वेळार केंद्रीय रेल्वे मंत्री हाजीर आशिल्ले. आमी पयलेच खेपे एकाच वेळार 2000 येवजण्यो सुरू करतात. रेल्वेच्या मुळाव्या साधनसुविधांत म्हत्वाचे बदल करपाक सुरु करपाचो हो दीस अशेंय मोदी हांणी म्हणलें.
खंयच्या राज्यांचीं स्टेशनां परतून बांदतले?
महाराष्ट्र – 56 रेल्वे स्टेशनां, गुजरात – 46, आंध्र प्रदेश – 46, तमिळनाडू – 34, बिहार – 33, मध्य प्रदेश – 33, कर्नाटक – 31, झारखंड – 27, छत्तीसगड – 21, ओडिसा – 21 आनी राजस्थान – 21 स्टेशनां परतून बांदतलें.
हाचेभायर 1500 ओव्हरब्रिज आनी अंडरपास हांचेय बुन्यादी फातर घाले. उत्तर प्रदेशांत 252, महाराष्ट्रांत 175, मध्य प्रदेशांत 133, गुजरातांत 128, तमिळनाडूंत 115, राजस्थानांत 106, छत्तीसगडांत 90 आनी झारखंडांत 83 प्रकल्पांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
