भांगरभूंय | प्रतिनिधी
नवी दिल्ली, खबरां संस्था ः भाजपाचे वरिश्ठ फुडारी नरेंद्र मोदी हांणी सेगीत तिसरे खेपे प्रधानमंत्री म्हूण सोपूत घेवन इतिहास रचलो. हें करपी ते पयले बिगर काँग्रेसी फुडारी आनी पं. जवाहरलाल नेहरू हांचे उपरांत दुसरे फुडारी. मोदी हांच्या फुडारपणा खाला भाजपा अंदूं भोवमताचो आंकडो पार करपाक शकलो ना. पूण भाजपाच्या फुडारपणा खाला राष्ट्रीय लोकशाय आघाडीन (एनडीए) भोवमत मेळोवपा खातीर जाय आशिल्ल्या 272 सुवातींचो पांवडो हुपलो. प्रधानमंत्री म्हणून मोदी हांकां पगार कितलो? तांकां खंयच्यो सुविधा मेळटात? संवसारांतल्या खंयच्या फुडाऱ्याक सगळ्यांत चड पगार मेळटा?
प्रधानमंत्र्याचो पगार कितलो?
भारताचे संसदीय लोकशाय वेवस्थेंत प्रधानमंत्री म्हूण नरेंद्र मोदी देशाचें खूब म्हत्वाचें पद सांबाळटात. देशाचे एकंदरीत उदरगती खातीर ते निर्णय घेतात. तांकां दर म्हयन्याक 1.66 लाख रुपया पगार मेळटा. वर्साक सुमार 20 लाख रुपया. हे रकमेंत मुळावो पगार 50 हजार रुपया, खर्च भत्तो 3 हजार रुपया, संसदीय भत्तो 45 हजार रुपया आनी दिसपट्टो भत्तो 2 हजार रुपया आसा. विशेश म्हळ्यार मोदी हांणी वेंचणुकेचें प्रतिज्ञापत्र सादर करतना बॉण्ड, डिबेंचर, शेअर वा म्युच्युअल फंडांत कसलीच गुंतवणूक ना अशें सांगून तांची वैयक्तीक मालमत्ता 3.02 कोटी रुपया आशिल्ल्याचें जाहीर केल्लें.
तांच्या प्रतिज्ञापत्रा प्रमाण तांचे कडेन येणावळीचे दोन स्रोत आसात. एक प्रधानमंत्री कार्यालयांतलो पगार आनी दुसरो व्याज उत्पन्न. प्रधानमंत्रीचे तुळेंत देशाच्या राष्ट्रपतीचो पगार चड आसा. तो दर म्हयन्याक पांच लाख रुपया आसा. 2018 वर्सा राष्ट्रपतीचो पगार 1.5 लाख रुपया आशिल्लो. उपराष्ट्रपतीचोय पगार चार लाख रुपया आसा. ‘एनडीटीव्ही’ च्या अहवाला प्रमाण खासदारांचो मुळावो पगार एक लाख रुपया आसा. खासदारांच्या पगारांत वाड निमाणी 2018 वर्सा जाल्ली. खासदारांक पगार सोडून दिसपट्टो भत्तोय मेळटा जो दर पांच वर्सांनी वाडटा.
प्रधानमंत्र्याक खंयच्यो सुविधा मेळटात?
पगार सोडल्यार प्रधानमंत्री म्हणून नरेंद्र मोदी हांकां जायत्यो सरकारी सुविधा मेळटात. तातूंत मुखेल अधिकृत सरकारी निवासस्थान आसा. तांचे भाडें आनी घर खर्चूय मेळटा. तशेंच तांकां भत्तोय मेळटा. स्पेशल प्रोटेक्शन ग्रुप (एसपीजी) सुरक्षा आनी अधिकृत भेटी खातीर एअर इंडिया वन आनी हेर विमानांचोय सुविधा मेळटात. प्रधानमंत्री फकत मर्सिडीझ-बेंझ एस 650 आनी रेंज रोव्हर सारक्या बुलेटप्रूफ गाडयांनी भोंवतात. ह्यो गाडयो एके- 47 रायफलाचो हल्लोय आडावंक शकतात. प्रधानमंत्री निवृत्त जाले उपरांत पांच वर्सां खातीर तांकां फुकट रावपाची वेवस्था, वीज, उदक आनी एसपीजी सुरक्षा लेगीत मेळटा.
संवसारांतल्या खंयच्या फुडाऱ्यांक चड पगार?
मेळिल्ले म्हायती प्रमाण, संवसारीक फुडाऱ्यां मदीं सिंगापूरच्या प्रधानमंत्र्याक सगळ्यांत चड पगार मेळटा. सिंगापूरचे प्रधानमंत्री लॉरेन्स वोंग हांकां वर्साक 2.2 दशलक्ष डॉलर (18.37 कोटी रुपया) मेळटा. हाँगकाँगचो जॉन ली का-चिउ हो संवसारांतलो दुसरो सगळ्यांत चड पगार घेवपी फुडारी. ‘साउथ चायना मॉर्निंग’ पोस्टा प्रमाण तांकां वर्साक सुमार 6,72,000 डॉलर (5.61 कोटी रुपया) मेळटात. स्वित्झर्लंडाच्या फुडाऱ्यांक वर्साक 4,95,000 डॉलर (4.13 कोटी रुपया) पगार मेळटा. अमेरिकेचे अध्यक्ष जो बायडेन हांकां वर्साक 4,00,000 डॉलर (3.34 कोटी रुपया) पगार मेळटा. ते भायर तांकां व्हाइट हाऊस, एअर फोर्स वन सारकिल्ल्यो खूब लक्झरी सुविधाय मेळटात. हांचे उपरांत ऑस्ट्रेलियेचो क्रमांक येता. प्रधानमंत्री अँथनी अल्बनीज हांकां वर्साक सुमार 5 लाख 50 हजार डॉलर पगार मेळटा.
ऋषी सुनक हांचे वैयक्तीक संपत्ती प्रमाण ते ब्रिटनाचे सगळ्यांत गिरेस्त प्रधानमंत्री. तांचो वर्सुकी पगार 2,12,000 डॉलर (1.77 कोटी रुपया) आसा. तशेंच लंडनांतल्या 10 डावनिंग स्ट्रीट हांगा आशिल्लें प्रधानमंत्रीचें अधिकृत निवासस्थान आनी बकिंगहॅमशायरांतल्या चेकर्स हांगाचें गांवगिऱ्या वाठारांतले निवासस्थान वापरपाचोय तांका अधिकार आसा. चीनाचे प्रधानमंत्री म्हणून शी जिनपिंगाच्या पगाराची आंकडेवारी अजून स्पश्ट जावंक ना. पूण 2015 वर्सा तांणी स्वताक आनी वरिश्ठ कार्यकारी अधिकाऱ्यांक 62 टक्के पगार वाड दिल्ल्याची म्हायती मेळिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
