भांगरभूंय | प्रतिनिधी
10 दिसांनी 3,886 जाणांची नोंदणी; आतां मेरेन 4,775 अर्ज
भांगरभूंय । प्रतिनिधी
पणजीः प्रधानमंत्री विश्वकर्मा येवजणेक गोंयांत उत्स्फूर्त प्रतिसाद मेळटा. फाटल्या 10 दिसांनी 3,886 कारागिरांनी येवजणे खाला नोंदणी केल्या. 15 नोव्हेंबराक 889 कारागिरांची पोर्टलाचेर नोंदणी आशिल्ली, मात 24 नोव्हेंबरा मेरेन हो आंकडो 4,775 चेर पाविल्ल्याचें कुशळटाय उदरगत खात्यान दिल्ले आंकडेवारींतल्यान मुखार आयलां.
गोंयांत सुमार देड लाख कारागीर आसात. ह्या सगळ्यांक केंद्र सरकाराचे विश्वकर्मा येवजणेचो लाव मेळोवन दिवपाचे यत्न गोंय सरकाराचे यत्न चालू आसात. ते खातीर जनजागृती विवीध माध्यमांतल्यान पुराय गोंयभरांत चल्ल्या. ताकाच लागून येवजणे खाला नोंदणी करप्यांचे संख्येंत वाड जायत आसा, अशी म्हायती कुशळटाय उदरगत खात्याचे संचालक एस. एस. गांवकार हांणी ‘भांगरभूंय’ कडेन उलयतना दिली.
आतां मेरेन उत्तर गोंयांतल्यान 3,169 आनी दक्षींय गोंयांतल्यान 1,606 अशे मेळून 4,774 जाणांनी येवजणे खातीर अर्ज केल्यात. 1,123 जाणांच्या अर्जांक मुळाव्या पांवड्यार मंजुरी लेगीत मेळ्ळ्या, अशी म्हायती गांवकार हांणी दिली.
देशभरांतल्यान आतां मेरेन हे येवजणे खातीर लाखांनी परंपरीक वेवसायिकांची नोंदणी जाल्या. तातूंत 24 नोव्हेंबर मेरेन गोंयांतल्या 4,774 जाणांचो आस्पाव आशिल्लो. येवजणे खाला गोंयांतल्या 18 तरेच्या वेवसायिकांक फायदो मेळटलो. परंपरीक वेवसायिकांनी पोर्टलाचेर नोंदणी केले उपरांत तांकां 15 हजारांचे टूलकीट फुकट दितले. वेवसाया खातीर सुरवेक 1 लाख, उपरांत 2 लाखांचे रीण तशेंच फुकट प्रशिक्षण लेगीत दितले.
मजगतीं, गोंया सयत देशभरांतल्या परंपरीक वेवसायिकांक घटसाण दिवपा खातीर केंद्र सरकारान प्रधानमंत्री विश्वकर्मा येवजण चालीक लायल्या. हे येवजणेक लागून गोंयांतल्या परंपरीक वेवसायांक परतून उर्जितावस्था मेळटली, असो विस्वास मुख्यमंत्री डॉ. प्रमोद सावंत हांणी उक्तायला. प्रधानमंत्री विश्वकर्मा येवजणेचे अंमलबजावणी खातीर सरकारान राज्य देखरेख समिती तशेंच दोनूय जिल्ह्यांनी अंमलबजावणी समित्यांचीय स्थापनी केल्या. ह्या समित्या वतीन गोंयभरांतल्या परंपरीक वेवसायिकां मदीं जागृतीचेर व्हड प्रमाणार भर दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
