भांगरभूंय | प्रतिनिधी
-प्रदेशाध्यक्ष सदानंद शेट तानावडे हांची म्हायती
पणजी: लोकसभा वेंचणुकेंतल्या भाजप उमेदवारांच्या प्रचारा खातीर प्रधानमंत्री नरेंद्र मोदी गोंयांत येवपाचे आसात. तांची जाहीर सभा दक्षीण गोंयांतल्या कुडचडें मतदारसंघांत जातली. प्रधानमंत्री कार्यालया कडल्यान अजून तारीख मेळूंक ना. पूण 28 एप्रील ते 1 मे ह्या काळांत तांची सभा जावपाची शक्यताय आसा, अशें राज्यसभा खासदार तशेंच भाजप प्रदेशाध्यक्ष सदानंद शेट तानावडे हांणी सांगलें.
दोनूय उमेदवारांच्या प्रचाराचो नियाळ घेवपाक भाजपाच्या कोअर समिती पदाधिकाऱ्यांची शेनवारा पणजे पक्ष कार्यालयांत बसका जाली. मुख्यमंत्री डॉ. प्रमोद सावंत हांचे सयत कोअर समितीतले हेर पदाधिकारीय बसकेक हाजीर आशिल्ले. दोनूय उमेदवारांच्या प्रचाराची पयली फेरी पुराय करून दुसरी फेरी सुरू जाल्या. फुडल्या काळांतल्या प्रचारात कितें बदल करचे, हे विशीं बसकेंत चर्चा जाली, अशें तानावडे हांणी सांगलें.
20 एप्रील उपरांत विवीध मतदारसंघांनी कोनसो बसका, जाहीर सभांचे आयोजन करतले. मंत्री, आमदार विवीध वाठारांनी रोडशो करून सभा घेतले. दोनूय उमेदवारांचे जाहीरनामे बेगिनूच प्रसिद्ध करतले. 16 एप्रील दिसा भाजपाचे दोनूय उमेदवार अर्ज सादर करतले, अशेंय तांणी नमूद केले.
………………………..
दोनूय उमेदवारांक उपाट प्रतिसादः मुख्यमंत्री
लोकसभा वेंचकणुकेंतल्या भाजपाच्या दोनूय उमेदवारांक लोकां कडल्यान उपाट प्रतिसाद मेळटा. ताका लागून हे खेपे दोनूय सुवातो भाजपाच जिखतलो, हाचेर आपलो ठाम विस्वास आशिल्ल्याचे मुख्यमंत्री डॉ. सावंत हांणी परतून एकदा सांगलें.
स्टार प्रचारकांच्याेय सभा
भाजपाच्या गोंयांतल्या स्टार प्रचारकां मदीं प्रधानमंत्री नरेंद्र मोदी हांचे सयत गृह मंत्री अमीत शाह, भाजपाध्यक्ष जे. पी. नड्डा, संरक्षणमंत्री राजनाथ सिंग, मंत्री नितीन गडकरी, देवेंद्र फडणवीस, प्रभारी आशिष सूद, सी. रवी, स्मृती इराणी हांचे सयत राज्यांतल्या मंत्र्यांचो आस्पाव आशिल्ल्याची म्हायती तानावडे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
