भांगरभूंय | प्रतिनिधी
नवी दिल्ली, खबरां संस्था: प्रधानमंत्री नरेंद्र मोदी फुडल्या धा दिसांत १२ राज्यांक आनी केंद्रशासीत प्रदेशांक भेट दितले. ह्या काळांत ते २९ कार्यावळींनी वांटो घेतले.
फुडल्या धा दिसांत प्रधानमंत्री मोदी तेलंगण, तामिळनाडू, ओडिशा, पश्चिम बंगाल, बिहार, जम्मू-काश्मीर, आसाम, अरुणाचल प्रदेश, उत्तर प्रदेश, गुजरात, राजस्थान आनी दिल्लीक भेट दितले. प्रधानमंत्री आयज तेलंगणा आदिलाबादांत खुबश्या प्रकल्पांचें उक्तावण करतले. उपरांत ते तामिळनाडूंतल्या कल्पक्कम हांगच्या न्युक्लियर पॉवर कॉर्पोरेशन ऑफ इंडिया लिमिटेड (भविनी)क भेट दितले.
प्रधानमंत्री मोदी हांच्यो तारखे प्रमाण कार्यावळी
५ मार्च : प्रधानमंत्री नरेंद्र मोदी ५ मार्चाक तेलंगणांतल्या संगारेड्डी हांगा खुबश्या प्रकल्पांचें लोकार्पण करतले. उपरांत ते ओडिशांत वचून चंडीखोल, जाजपूरांत खुबश्या उदरगतीच्या प्रकल्पांचें उक्तावण आनी पायाभरणी करतले. चांडिखोलचे जाहीर सभेक ते उलयतले. त्याच दिसा प्रधानमंत्री पश्चिम बंगालाक वतले.
६ मार्च: प्रधानमंत्री मोदी कोलकात्त्यांत उदरगतीच्या कामांचें अनावरण करतले आनी बारासांत हांगा बसकेक उलयतले. उपरांत ते बिहाराक वचून बेतियांत खुबश्या उदरगतीच्या प्रकल्पांचें उक्तावण आनी पायाभरणी करतले.
७ मार्च: प्रधानमंत्री ह्या दिसा जम्मू-काश्मीराक आसतले आनी सांजेवेळार ते एक मिडिया कार्यावळीक हाजीर रावतले.
८ मार्च: प्रधानमंत्री दिल्लीच्या पयल्या राष्ट्रीय निर्माता पुरस्कार सुवाळ्याक हाजीर रावतले.
९ मार्च: प्रधानमंत्री मोदी अरुणाचल प्रदेशांतल्या पश्चिम कामेंग हांगच्या सेला बोगद्याचें उक्तावण करतले आनी उपरांत इटानगरांत खुबश्या प्रकल्पांचें उक्तावण करतले. उपरांत ते आसामांतल्या जोरहाट हांगा अहोम आर्मी कमांडर लचित बोरफुकन हांच्या पुतळ्याचें अनावरण करतले. जोरहाट हांगा ते खुबश्या उदरगतीच्या कामांचें उक्तावण करतले आनी पायाभरणी करतले. उपरांत ते पश्चिम बंगालाकूय भेट दितले आनी सिलीगुडींत उदरगतीच्या कामांचें लोकार्पण करतले.
मजगतीं, प्रधानमंत्री नरेंद्र मोदी ४ फेब्रुवारीक गुवाहाटी पावले. हांगच्या पशुवैजकी महाविद्यालयाच्या मैदानाचेर ते जाहीर बसकेक उलयतले. हांगच्या पशुवैजकीय महाविद्यालयाच्या मैदानार तांणी जाहीर सभेक भाशण केलें.
१० मार्च : प्रधानमंत्री नरेंद्र मोदी उत्तर प्रदेशांत आसतले आनी आझमगडांत खुबश्या प्रकल्पांचें उक्तावण करतले.
११ मार्च: प्रधानमंत्री मोदी दिल्लीक ’नमो ड्रोन दीदी’ आनी ’लखपती दीदी’ कार्यावळी कडेन संबंदीत कार्यावळीक हाजीर रावतले. उपरांत ते द्वारका एक्सप्रेसवेच्या हरियाणा विभागाचें उक्तावण करतले. सांजेवेळार ते संरक्षण संशोधन आनी विकास संस्था (DRDO) चे कार्यावळीक हाजीर रावतले.
१२ मार्च : प्रधानमंत्री गुजराताक साबरमती आनी राजस्थानांत पोखरणाक भेट दितले.
१३ मार्च: प्रधानमंत्री मोदी व्हिडिओ कॉन्फरन्सिंगा वरवीं गुजरात आनी आसामांतल्या तीन म्हत्वाच्या अर्धसंवाहक प्रकल्पांची पायाभरणी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
