भांगरभूंय | प्रतिनिधी
पणजी ः प्रधानमंत्री जीवनज्योती विमो येवजणे खाला राज्यांतल्या 3.10 लाख लोकांनी विमो घेतला. मजगतीं, फुडल्या दिसांनी लावार्थ्यांचो आंकडो वाडोवपाचो यत्न सुरू आसा अशी म्हायती युनियन बँक ऑफ इंडियाचे क्षेत्रीय मुखेली आशीष मालवीय हांणी दिली. स्टार युनियन दायइची वतीन बुधवारा आयोजीत केल्ल्या प्रधानमंत्री जीवनज्योती विमा येवजण जागृताय मोहिमेच्या उक्तावण सुवाळ्यांत ते उलयताले. ह्या वेळार बँक ऑफ इंडियाचे विवेक दाधीच, गुरूविंदर सिंग आनी हेर अधिकारी हाजीर आशिल्ले.
जीवन ज्योती विमा येवजणे खातीर वर्सुकी फकत 436 रुपया भरचे पडटात. हातूंत एका मनशाचो 2 लाख रुपया विमो जाता. सामान्य मनशाक परवडपी दरांत मेळपी हो एकूच विमो. विमो कागदपत्रांचेरूय सहज प्रक्रिया जाता. विम्याची रक्कम मेळोवपाची प्रक्रियाय सोपी आसा अशें मालवीय हांणी सांगलें. तशेंच राज्यांतल्या सगळ्या लोकांनी हे येवजणेचो लाव घेवचो असो उलो तांणी मारलो.
मजगतीं, जागृती अभियाना खाला दोनूय जिल्ह्यांतल्या 50 सुवातींनी विमा रथ भोंवडयतले. हे येवजणेचो फायदो लोकांक पटोवन दिवन तांची नोंदणी करतले. ही येवजण 18 ते 50 वर्सां पिरायेच्या गटांतल्या व्यक्तीं खातीर उपलब्ध आसतली. हे येवजणे प्रमाण विमो प्रीमियम 31 मे दिसा भरचो पडटलो आनी विमो कव्हर 1 जून ते 31 मे मेरेन आसतलो. हे येवजणे खाला विमो दाव्यांचो निवाडो करपाचीय रक्कम चड आसा अशी म्हायती गुरूविंदर सिंग हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
