भांगरभूंय | प्रतिनिधी
मुख्यमंत्री : 20 वो हप्तो देशभरांतल्या शेतकारांक वितरीत
भांगरभूंय | प्रतिनिधी
दिवचलः फाटल्या 60 वर्सांत शेतकारां खातीर कोणेंच करूंक ना इतलें काम प्रधानमंत्री नरेंद्र मोदी हांणी फाटल्या 10 वर्सांत केलां. गोंयांतल्या शेतकारांक कृशी सम्मान निधी येवजणे खाला तांच्या खात्यांत 24 कोटीं रुपयांचो निधी जमा जाल्ल्यान तांकां थाकाय मेळ्ळ्या. गोंयांत शेती समृध्द करपा खातीर गट शेतींतल्यान तरणाट्यांनी आधुनीक तंत्रांचो वापर करून क्रांती घडोवन हाडची, असो उलो मुख्यमंत्री डॉ. प्रमोद सावंत हांणी मारलो..
प्रधानमंत्री कृशी सम्मान निधीचो 20 वो हप्तो देशभरांतल्या शेतकारांक वितरित केलो. ह्या वेळार लायव्ह प्रक्षेपणाचे कार्यावळींत मुख्यमंत्र्यान गोंयच्या शेतकारांक मार्गदर्शन करतना स्वयंपूर्ण आत्मनिर्भर गोंयचें सपन साकार करपा खातीर तरणाट्यांनी गट शेती कडेन वळचें असो उलो मारलो.
गोंयांत शेतकी खात्यान 47 वेगवेगळीं येवजण्यो आंखून जायत्यो सवलती दिवन दरेका शेतकाराक व्हड थाकाय मेळ्ळ्या. प्रधानमंत्री नरेंद्र मोदी शेतकारां विशीं खूब संवेदनशील आसात आनी क्रेडीट कार्ड आनी हेर मार्गां वरवीं शेतकारांनी येवजण्यांचो लाव घेवचो अशें मुख्यमंत्र्यान सांगलें.आधारभूत मोल आनी हेर मार्गांनी शेतकारांक सगले तरेचो आदार मेळटा अशें मुख्यमंत्र्यान सांगलें. ह्या वेळार नगराध्यक्ष विजयकुमार नाटेकार, सिद्धी प्रभू, आनंद काणेकार, शेतकी संचालक संदीप फळदेसाय, दत्तप्रसाद जोग आनी हेर मानेस्त हाजीर आशिल्ले. तशेंच गोंयांतल्या वेगवेगळ्या वाठारांतले शेतकार व्हड प्रमाणांत हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
