भांगरभूंय | प्रतिनिधी
ठाकरे हांच्या तेंक्याक लागून पाटकार आक्रमक
पणजी: प्रभारी माणिकराव ठाकरे हांणी दिल्ल्या घटमूट तेंक्याक लागून काँग्रेस प्रदेशाध्यक्ष अमीत पाटकार आनीक आक्रमक जाल्यात आनी फुडल्या कांय दिसांत प्रदेश काँग्रेस समितींत व्हड बदल करपा सयत पक्ष विरोधी कारवायो करप्यांचेर खर कारवाय करपाचो निर्णय तांणी घेतिल्ल्याची म्हायती काँग्रेसींतल्या गोपांनी आयतारा ‘भांगरभूंय’ कडेन उलयतना दिली.
कांय दिसां पयलीं पणजेंत प्रभारी माणिकराव ठाकरे आनी प्रभारी सचीव डॉ. अंजली निंबाळकर हांचे हाजिरेंत जाल्ले कार्यावळींत उलयतना ठाकरे हांणी पक्षांतूच आमचे दुस्मान आशिल्ल्याचो दावो केल्लो. उपरांत पक्षाची शिस्त पाळिनाशिल्ल्यान दया दाखयतनास तांचेर कारवाय करतले अशी गवाय ठाकरे हांणी दिल्ली. हे कार्यावळी उपरांत ठाकरे, पाटकार आनी निंबाळकर ह्या तिनूय फुडाऱ्यांनी येता ती जिल्हो पंचायत तशेंच विधानसभा वेंचचणुकेचे रणतिनीचेर चर्चा जाली आनी तातूंत पक्ष विरोधी कारवायो करप्यांचेर खर कारवाय करपाचे निश्चीत केलें. ते प्रमाण पाटकार हांणी पक्षाक घातक थारिल्ल्या कांय जाणांची वळेरीय तयार केल्या आनी तांकां पक्षांतल्यान निलंबीत करपाचो विचार लेगीत सुरू केल्ल्याचें गोपांनी सांगलें.
पक्षा खातीर योग्य तो निर्णय घेतलों: पाटकार
फुडल्या काळांत पक्ष सघटणा घटमूट करपाचेर म्हजो भर आसतलो. ते खातीर जे निर्णय घेवचे पडटले ते आपूण घेतलों अशें अमीत पाटकार हांणी स्पश्ट केलें. चाळिसूय मतदारसंघांत पक्षाक घटमूट करून जिल्हो पंचायत आनी विधानसभा वेंचणुकेक सामकार वचपाचो निश्चेव लेगीत तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
