भांगरभूंय | प्रतिनिधी
फक्त चड प्रदुशण करपीच कारखान्यांची कित्याक, सरकारान सगल्यांचीच तपासणी करची.
पर्यावरण पयलीं सावन हे धर्तरेर आसा. तें सांबाळप आमची लागणूक. सैम तिगलें जाल्यार आमी वाटावले, नाजाल्यार. संवसारीक तापमान इबाडलां ताका पर्यावरणाचो नाश हें एक कारण आसा. जो तो दोंगर, रानां बोडकावन जमनी विकपाक संवकला. वतना कोणाकूच जोडिल्लो पयसो, संपत्त पोटार घेवन वचपाक मेळना. तरीय आमी खा खा खायत सुटल्यात. सैम काबार केल्ल्यान वा प्रदुशण केल्ल्यान ताचे आमकांच त्रास जाल्यात, जातात आनी फुडाराकूय जावं येतात. उद्देग वाडपाक जाय. घराघरांनी पसून ते जाल्यार उपकारता, पूण पर्यावरणाच्या जिवार न्हय. सैम हें दायज आसलें तरी ते फुडाराचे पिळगे कडल्यान घेतिल्लें रीण मानचें. तांकां ते ज्युरा सयत परत दिवपाचें आसा, हें मतींत दवरून वावरुंक जाय. नाजाल्यार फुडाराक नातरां, पण्टुरां कडल्यान आमकां गाळी खांवच्यो पडटल्यो.
गोंयांतल्या 11 अतिप्रदुशणकारी प्रकल्पांची दर तीन म्हयन्यांनी तपासणी जाता. केंद्रीय प्रदुशण नियंत्रण मंडळान हे विशींच्या मार्गदर्शक तत्वांत सुदारणा केल्या. आतां तीन म्हयन्यांनी एकदां तांची पुराय तपासणी जाता. सरकारी नेम उद्देग पाळटात काय नात, ताचीय पळोवणी जाता. फुडाराक तपासणीचो आंकडो वाडपाक शकता. ते खातीर मंडळान एक देखरख विभागूय स्थापन केला. हे सगले प्रकल्प उसगांव, पिसुर्ल्यां, बेतोड्यां, कुंकळ्ळे, सांगें, आमोण्यां, खोर्ले, झुवारीनगरांत आसात. खास करून हवा, उदकाच्या प्रदुशणाची तपासणी जाता. प्रदुशणाक सगल्यांनीच गांभिर्यान घेवपाक जाय. ह्या दरेका प्रकल्पाची खोलायेन म्हयन्याक एक फावट तरी तपासणी जावची. मनीसबळ आनी संसाधनांचे मर्यादेक लागून हें शक्य जायतशें दिसना. ते खातीर प्रयोगशाळा, तंत्रीक कर्मचारी, निधी लागता. खरें म्हणल्यार असले कारखाने गोंयांत सुरू करतनाच धा फावटी विचार करूंक जाय. कारण तातूंत गोंयकार कामगारांचो आंकडो चड आसताच अशें ना. जे कारखाने चड धोक्याचे, तांची तपासणी सतत जावप बरें. बऱ्याच उद्देगां कडेन आॅनलायन प्रदुशण देखरेख यंत्रणा आसता, ताचो डेटा मंडळा कडेन अदीं मदीं पावता. गोंयांत कितल्या जाणांनी ती बसयल्या?
प्रदुशणाक लागून वायटूच परिणाम जातात. दमो, काळजाचे विकार, कॅन्सर हे हवा इबाडल्यार जावंक शकतात. उदकाचें प्रदुशण तळीं, न्हंयो, बांयो दुशीत करता, शेतां, नुस्तेमारीचेरूय परिणाम जाता. माती इबाडल्यार अन्न साखळ तुट्टा. आवाजाचें प्रदुशण मानसीक ताण दिता. आयकुपाची शक्त उणी जाता. पर्यटन राज्यांक हें सामकें धोक्याचें. गोंयचें पर्यावरण इबाडलें जाल्यार अर्थवेवस्थेक व्हडलो फटको बसपाक शकता. आपल्या कारखान्यांत प्रदुशण जावचें ना हे खातीर प्रत्येकान आधुनीक तंत्रज्ञान वापरपाक जाय. उदक, हवा शुद्ध करपाची यंत्रणा जाय. कोयराचो विलो लावपाचीय गरज आसा. फक्त चड प्रदुशण करपीच कारखान्यांची कित्याक, सरकारान सगल्यांचीच तपासणी करची. नागरिकां खातीर कागाळ विभाग आसतात, मात ताच्या कागाळींचेर विचार जाताच अशें ना. आतां वास्को कोळश्याचो दुर्गंध येता. ताचेर उपाय घेवप सुरू जालां? घाणयारें उदक न्हंयांनी सोडपी, धुंवर सोडपी कारखान्यांचें कितें? कांय कडेन रसायनांय उदकांत मिस्तुराद जातात.
गोंयांतल्या सगल्या उद्देगीक वसणुकांची तपासणी करून थंय प्रदुशण करपी कितले कारखाने, उद्देग आसात, ताची पळोवणी जाल्या? हांगाचे उदकाचे सांठे दुशीत जायत आसात, तातूंत प्रदुशण करपी नवे उद्देग आयले जाल्यार ते समाजाक घातक थारतले. गोंयच्या तरणाट्यांचे कालेतीक मानवतात, तसले उद्देग, वेवसाय हाडप शक्य ना? आयटी मळाचेर पुण्यां, बंगळुरा काम करपी बरेच गोंयकार आसात. तसल्या उद्देगांचो गोंयांत आंकडो वाडल्यार तांकां आनी नवे पिळगेक फायदोच जातलो.
सध्या आसा तितले प्रदुशणकारी उद्देग पुरो. गोंयचें सैमूच उणें जावंक लागलां. ताका आनीक प्रदुशण करपी उद्देगांचो हातभार लागपाक नाका.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
