भांगरभूंय | प्रतिनिधी
राजीव गांधी प्रधानमंत्री आसतना तांणी सॅम पित्रोदा हांकां अमेरिकेंतल्यान खास आपोवन तांकां भारतांत घराघरांनी टेलिफोनाचें जाळें विणपाचें काम दिल्लें. वांगडाच तांणी संगणकूय सगल्यांक पावचो हे खातीर फुडाकार घेतिल्लो. 1980 च्या दशकांतली ही गजाल. ताचे पयलीं 21 जानेवारी 1969 दिसा पयलो पुराय देशी डिजीटल कंम्प्युटर भाभा अणु संशोधन केंद्रांत सुरू जाल्लो. पं. नेहरुच्या वेळा पसून हें काम सुरू आशिल्लें. पूण ताचो नेटान प्रसार जालो, 1980 च्या उत्तरार्धांत आनी 1990 च्या दशकांत. राजीव गांधी हांकां पुराय देशांत इलेक्ट्राॅनिक क्रांती हाडपाची आशिल्ली. ते खातीर तांणी व्हिजन 2020 हे कार्यावळी वरवीं कम्प्युटरायझेशन आनी टेलेकाॅम्युनिकेशनाचेर भर दिलो. त्या वेळार संवसारांतूय ते विशीं जागृताय जाताली. 2000 लागचे पयलींच जंय संगणक नात, थंय ते पावले. फक्त 10 वर्सां भितर हें सपन साकार जालें. आयज संगणक आनी ताचेंच ल्हान रुप मोबायल फोना बगर कोणाक स्वासूय घेवपाक मेळना, अशी परिस्थिती जळीमळीं पळोवपाक मेळटा.
कालूच गोंय सरकारान सगल्या शाळांक इंटरनेट सेवा दिवपाचें थारायलां. सद्या सगल्या शाळांनी इंटरनेट आसा. मात ही सेवा सरकारी आसतली. संगणक विभागूय आसात. ही सुविधा सरसकट सगल्या शाळांनी उपलब्ध आसपाक जाय. कारण फुडलें युग हें संगणकाचें. आतां ताची सुरवात जाल्या. कोरोनाच्या काळांत भुरग्यांनी आॅनलायन शिक्षण घेतलें. भोवतेक विद्यार्थी मोबायल फोन, संगणक वापरांत तरबेज आसात. मात शालेय पावंड्याचेर तांकां हे विशींचें मार्गदर्शन मेळ्ळ्यार, ज्ञान मेळोवपाकूच न्हय, तर मुखार रोजगाराकूय हाचो फायदो जावं येता. आयज प्रत्येक कडेन कसलेय नोकरे खातीर संगणक हो जायच पडटा. जांव तें मागीर सरकारी कार्यालय वा दिसाळ्यांची कचेरी. संगणक येना तो फाटीं उरता. सर्गेस्त मनोहर पर्रीकार हांणी होच विचार करून दरेका भुरग्याक लॅपटाॅप दिल्ले, पूण तांचो मागीर गैरवापर जालो, ती गजाल वेगळी. तरीय हे येवजणेक लागून बऱ्याच भुरग्यांक संगणकाची वळख जाली, गोडी लागली, हें विसरूंक फावना.
सरकारान इंटरनेट सेवा दिवपा बाराबरूच सगल्या शाळांनी संगणक विभाग सुरू करचे आनी संगणक सगल्या भुरग्यांक वापरूंक मेळटले हाची खबरदारी घेवची. मोजक्याच विद्यार्थ्यांक हे सुविधेचो लाव मेळप अन्यायकारक. विद्यार्थ्यां खातीर खास संगणक अभ्यासक्रमूय शाळांनी शिकोवं येता. निदान तांकां संगणक हाताळपाक आनी रोमी, देवनागरी टायपींग शिकपाक मेळचें.
लायट सामकी गरजेची
लायट गेली काय लोक बोवाळ कित्याक मारतात, अर्दवर पसून पाशियेस काडपाक जायना? अशें जायते जाण म्हणटात. तांचें बरोबर आनी बोवाळ मारतात तांचेय बरोबर. कारण आयज घरूच लायटीचेर चलता म्हणल्यार जाता. लायट नासल्यार फॅन, एसी चलना, बल्ब, ट्युबलायटी पेटनाशिल्ल्यान काळोख पातळटा. मिक्सर, फ्रीज, गिझर, टीव्ही बंद उरता. संगणक, मोबायल रिचार्ज करपाक मेळनात. आतां इलेक्ट्रीक वाहनां आयल्यांत. ती चार्ज जायनात. कारखाने, कार्यालयांनी जनरेटर, पावर कन्व्हर्टर चलना. लायटी बगर तांचें कामूय ठप्प उरता. आदल्या तेंपार हातूंतल्यो बऱ्योच वस्तू, उपकरणां नाशिल्लीं. आयज ती परिस्थिती ना. आयज सगल्यांकूच लायट लागता.
लायटीचो आपालिपा आनी हेर समस्यांचेर आतां वीजमंत्र्यान सोमारा अभियंत्यांनी बसका आपयल्या. तातूंत गोंयांक 24 वरां वीज मेळटली, हाचेर भासाभास जावची. गोंयांतली वीज यंत्रणा सुदारपाची, तिची तांक वाडोवपाची गरज आसा. तमनार कंपनीची लायट येवपाची आसा. तीय बेगीन येवची. कारण गोंयां सारक्या पर्यटन राज्याक दिसान दीस चड – चड लायट लागतली. शेजराच्या राज्यांतल्यान ती मेळपाक शकता. पूण ती खाची कोनशांनी व्हरपा इतली आमचे यंत्रणेची तांक ना. फाल्यां ओव्हरलोड जालो जाल्यार दोन दीस काळखांत रावचें पडूं येता. आदले खांबे, केबल्स, सरयो पांवड्या पांवड्यान बदलपाक जाय. 30- 40 वर्सां हें लायटीचें सामान तग धरपाक शकना. लायट परत- परत कित्याक चल्ली, हाचेर अभ्यास करून उपाय काडल्यार, ते गोंयचे उदरगतीकूय चालना दिवपी थारतलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
