भांगरभूंय | प्रतिनिधी
पणजी : गोवा चेंबर ऑफ कॉमर्स अॅण्ड इंडस्ट्रीजच्या (जीसीसीआय) अध्यक्षपदाचेर प्रतिमा धोंड हांची निवड जाल्या. जीसीसीआय 117 वर्सांच्या इतिहासांत पयलेच खेपे एके बायलेची अध्यक्ष म्हूण निवड जाल्या. तांचो कालावधी 2025 ते 2027 मेरेन आसतलो. त्यो 1 जुलयाक पदाचीं सुत्रां ताब्यांत घेतल्यो. निवडी उपरांत धोंड हांणी सांगलें, गोंयांतल्या उद्देगीक मळाक तशेंच महिला उद्देजगांक उर्बा दिवपाचें काम करतली. ह्या वेळार संघटणेच्या 14 वांगड्यांची लेगीत वेवस्थापकी समितीची निवड केली.
संघटणेचे सध्याचे अध्यक्ष श्रीनिवास धेंपो हांचो कार्यकाळ 30 जूनाक सोंपतलो. ते उपरांत धोंड अध्यक्षपदाचो ताबो घेतल्यो.
धोंड हांणी आपले कारकिर्दींत महिला सक्षमीकरण करचे खातीर विवीध उपक्रम चालीक लायल्यात. त्यो 1993 सावन महिला सहकारी बँकेच्या मुखेलीपदाचेर आसात. फाटल्या 8 वर्सां सावन जीसीसीआयच्या महिला विभागाच्यो अध्यक्ष आसात. महिला उद्देजकतेक उर्बा दिवचे खातीर तांणी ‘अस्तुरी’ ही कार्यावळ सुरू केल्या.
धोंड ह्यो वाकाओ फुड्स आनी धोंड ग्रूप ऑफ कंपनीच्यो संचालक आसात. तांणी एक अणभवी रोटरी क्लबा खातीर लेगीत काम केलां. त्यो रोटरी क्लब ऑफ मिरामारच्यो चार्टर अध्यक्ष म्हूण काम पळयतात. तांणी आपलें शिक्षण पिपल्स हायस्कूल पणजी आनी धेंपो कॉमर्स कॉलेजींतल्यान पुराय केलां. त्यो राष्ट्रीय पांवड्या वयल्या बास्केटबॉल खेळगडी आसल्यो. जीसीसीआयन वेंचिल्ल्या वेवस्थापकी समितींत डॉ. संगम कुराडे, चंद्रकांत गांवस, हर्षवर्धन भाटकुले, यतीन काकोडकार, पल्लवी साळगांवकर, रोहन भंडारे, राजेश धेंपो, डेल मिनेझीस, रोआना मारिया कोस्ता, सतीश शिंदे, विनेश पिकाले, प्रसाद केणी, मनोज पाटील आनी अत्रेया सावंत हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
