भांगरभूंय | प्रतिनिधी
‘राम नाम सत्य है’ 2020 तलें आंदोलन प्रकरण
भांगरभूंय । प्रतिनिधी
मडगांवः काँग्रेसींत आसतना 2020 त प्रतिमा कुतिन्हो हांच्या फुडारपणा खाला दुचाकी तिरडीचेर घालून ‘राम नाम सत्य है’ म्हणत आंदोलन केल्लें. ह्या प्रकरणांत हिंदूंच्यो भावना दुखावल्ल्या प्रकरणांत कुतिन्हो आड गुन्यांव नोंद जाल्लो. न्यायालया कडल्यान अजामीनपात्र वॉरपंट जारी केले उपरांत आयतारा तांकां मडगांव पुलिसांनी अटक केली आनी उपरांत जामिनाचेर सुटका केली.
काँग्रेस पक्षांत आसतना समाज वावुरपी प्रतिमा कुतिन्हो हांणी रस्त्याचेर देंवून विवीध आंदोलनां केल्लीं. जिलय 2020 त दक्षीण गोंय जिल्हो महिला काँग्रेसी वतीन इंधन दरवाड जाल्ल्याचो निशेध नोंद केल्लो. ह्या वेळार मडगांव पोरण्या मार्केटा पासून दक्षीण गोंय जिल्होधिकारी कार्यालयां मेरेन रॅली काडिल्ली. त्या वेळार दुचाकी तिरडीचेर घालून खांदो दिवन प्रतिकात्मक आंदोलन केल्लें. ह्या आंदोलना उपरांत फातोड्डें पुलिसांनी हिंदूच्यो धर्मीक भावना दुखयल्ल्या प्रकरणांत गुन्यांव नोंद केल्लो. तशेंच ह्या प्रकरणांत चार्टशीट लेलगीत जुलयांत दाखल केल्लें.
ह्या प्रकरणाची न्यायालयांत सुनावणी चालू आशिल्ली. सुनावणेक गैरहाजीर रावता हे खातीर न्यायालया कडल्यान ह्या प्रकरणांत प्रतिमा कुतिन्हो हांचे आड आजामीनपात्र वॉरंट जारी केलां. ते प्रमाण मडगांव पुलीस शेनवारा प्रतिमाच्या घरा तिका सोदपा खातीर गेले, पूण ती घरा मेळूंक ना. ते उपरांत आयतारा सकाळीं मडगांव पुलीस परतून तिका सोदपा खातीर तिच्या घरा गेले आनी तिका पुलिशेचे गाडयेंतल्यान मडगांव पुलीस स्टेशनार हाडली. सांजे वेळार मडगांव पुलिसांनी तिका अटक केली. ते उपरांत 10 हजार रुपयांच्या वैयक्तीक हमीचेर आनी तितलेच रकमेचो हमीदार हे अटीचेर तिका जामीन मंजूर केलो.
प्रतिमाक समर्थन दिवपाक गोंयभरांतले समाज वावुरप्यांनी पुलीस स्टेशना भायर गर्दी केल्ली. तांणी हे कारवायेचेर टिका केली. मजगतीं, सोमारा दनपारां मडगांव प्रथमवर्ग न्यायालयांत सुनावणे खातीर हाजीर रावपाक प्रतिमाक सांगलां.
लोकां खातीर लढो कायम दवरतलीः प्रतिमा कुतिन्हो
आपूण गोंय सरकारा आड आवाज काडटा हे खातीर आयतारा पुलिसांनी येवन आपल्याक ताब्यांत गेतली. आपूण घरकारा वांगडा पुलीस स्टेशनार येता, अशें सांगून लेगीत पुलिसांनी आयकूंक ना. हे मुखार लेगीत लोकां खातीर लढो कायम दवरतली, अशें प्रतिमा कुतिन्हो हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
