भांगरभूंय | प्रतिनिधी
भारताचो युवा ग्रॅण्डमास्टर आर प्रज्ञानंदान संवसारीक बुद्दीबळ सर्तीचे फायनलींतले पयले गेमींत संवसारीक क्रमवारींत पयले सुवातेर आशिल्ल्या नॉर्वेच्या मॅग्नस कार्लसनाक बरोबरीचेर आडायलो.
दोनूय खेळगड्यांनी उत्कृश्ट खेळ केलो. अखेरेक 18 वर्सां पिरायेच्या प्रज्ञानंद हाणें कार्लसनाक बरोबरीचेर मॅच सोडोवपाक लायली. धव्या घुलांनी खेळपी प्रज्ञानंदान पयल्या क्रमांकाच्या खेळगड्याक नाकापुरो केलो आनी 35वे चालींत दोगूय ग्रॅण्डमास्टरांनी बादाबाद दवरपाक सहमती दाखयली.
आयज दुसरी गेम जातली. कार्लसन धव्या घुलांनी खेळटलो.
कार्लसना आड खेळटना आपल्याचेर कसलेंच चेपण नाशिल्लें अशें मॅच सोंपल्या उपरांत पत्रकारां कडेन उलयतना प्रज्ञानंदान सांगलें.
नेमा प्रमाण दोनूय ग्रॅण्डमास्टरांक 1 वर 30 मिनटांनी 30 चाली खेळपाच्यो आसतात. पूण, कार्लसनाक पयल्या एका वरांत फकत 13 चाली खेळप शक्य जाल्यो. पूण, ते उपरांत प्रज्ञानंद 15वे चाली उपरांत फाटीं पडलो. हे मजगतीं, दोगांयनी आपले वझीर वगडायले. गॅमीक बरी सुरवात करपी प्रज्ञानंद उपरांत ल्हवल्हव फाटीं पडत गेलो.
मजगतीं, संवसारीक बुद्दीबळ सर्तीचे फायनलींत पावपी प्रज्ञानंद भारताचो दुसरे ग्रॅण्डमास्टर थारलो. दुसरे सेमी फायनलींत प्रज्ञानंदान अमेरिकेच्या फॅबियानो कारुआनाक टायब्रेकरांत हारयिल्लो.
संवसारीक बुद्दीबळ सर्तीचे फायनलींत सुवात मेळोवपी प्रज्ञानंद सर्तीच्या इतिहासांतलो सगल्यांत उण्या पिरायेचो ग्रॅण्डमास्टर थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
