भांगरभूंय | प्रतिनिधी
भारताचो युवा ग्रॅण्डमास्टर आर प्रज्ञानंदान लास व्हेगासांत जाल्ले फ्री स्टायल बुद्दीबळ ग्रॅण्ड स्लॅम सर्तींत झणझणीत कामगिरी केली. चवथे फेरयेंतले मॅचींत ताणें संवसारीक क्रमवारींत पयले सुवातेर आशिल्ल्या मॅग्नस कार्लसनाक हारयलो. प्रज्ञानंदान ही मॅच फकत 39 चालींनी सोंपयली. कांय दिसां पयलीं जाल्ले नॉर्वे बुद्दीबळ सर्तींत डी गुकेशान कार्लसनाक हारीचो धपको दिल्लो.
धव्या घुलांनी खेळपी आर प्रज्ञानंदान उत्कृश्ट सुरवात केली. संपूर्ण मॅचींत ताणें नियंत्रणांत दवरून खेळ केलो. हे मॅचींत मॅग्नल कार्लसनाची अचूकताय 84.9 टक्के जाल्यार आर प्रज्ञानंदाची अचूकताय 93.9 टक्के इतकी आशिल्ली. 10 मिनटां आनी 10 सेकंदां मेरेन चलिल्ले मॅचींत प्रज्ञानंदान प्रतिस्पर्धी खेळगड्याचेर नियंत्रण दवरिल्लें.
प्रज्ञानंदान बुद्दीबळांतल्या तिनूय प्रकारांनी म्हणल्यार क्लासिकल, रॅपीड आनी ब्लिट्डांत कार्लसनाक हारयलो.
सध्या आपल्याक क्लासिकल परस फ्री स्टायल बुद्दीबळ खेळपाक चड आवडटा अशें मॅच सोंपल्या उपरांत पत्रकारां कडेन उलयतना प्रज्ञानंदान म्हणलें.
प्रज्ञानंदान सर्तींतले पयले फेरयेंत अब्दुसत्तोरोवा आड काळ्या घुलांनी खेळटना मॅच बादाबाद दवरिल्ली. ते उपरांत ताणें असोबाये हाका हारयलो. तिसरे फेरयेंत काळ्या घुलांनी खेळटना ताणें केमराक हारयलो. चवथे फेरयेंत कार्लसनाक हारोवन ताणें सगल्यांक अजापाचो धपको दिलो. हे हारी उपरांत कार्लसनाचें सर्तींतलें आव्हान सोंपलें. तशेंच ह्या जैता उपरांत प्रज्ञानंद गुणतकट्यांत जोड रितीन पयले सुवातेर पावलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
