भांगरभूंय | प्रतिनिधी
भारताचो युवा ग्रॅण्डमास्टर आर प्रज्ञानंदान संवसारीक वस्ताद चीनाच्या डींग लिरेना आड पयले फेरयेंत आर्मागेडनांत मेळिल्ले हारीचो बदलो घेतना नॉर्वे बुद्दीबळ सर्तीचे सातवे फेरयेंत जैत जोडलें. लिरेनान बरे स्थितींत पावल्या उपरांत साबार चुकी केल्यो आनी अखेरेक त्योच चुकी ताका म्हारग पडल्यो.
क्लासिकल प्रकारांतली लडत बादाबाद उरल्या उपरांत निकाल लावपाक आर्मागेडनाचो आदार घेवचो पडलो. तातूंत प्रज्ञानंदान जैत जोडलें. नॉर्वेच्या मॅग्नस कार्लसनान अमेरिकेच्या हिकारू नाकामुरा आड सावकाश सुरवात केली आनी आर्मागेडनांत हारलो. फ्रान्साच्या फिरौझा अलिरेझान अमेरिकेच्या फॅबियानो कारुआनाक हारयलो.
सर्तींत अजून तीन फेरयो बाकी आसात. कार्लसन 13 गुणां सयत पयले सुवातेर आसा. नाकामुरा ताच्या परस अर्द्या गुणान फाटीं आसा. प्रज्ञानंद 11 गुणां सयत तिसरे सुवातेर आसा. अलिरेझा चवथे आनी कारुआना पांचवे सुवातेर आसा. लिरेन निमाणे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
