भांगरभूंय | प्रतिनिधी
संवसारीक क्रमवारींत पयले सुवातेर आशिल्ल्या नॉर्वेच्या मॅग्नस कार्लसनान संवसारीक बुद्दीबळ सर्त जिखली. फायनलींत ताणें भारताच्या 18 वर्सां पिरायेच्या आर प्रज्ञानंदाक टायब्रेकरांत हारयलो. कार्लसनान पयलेच खेपे ही सर्त जिखली.
प्रज्ञानंदाक उप वस्तादपणाचेर समाधान मानचें पडलें, तरी ताणें हे सर्तींत उत्कृश्ट प्रदर्शन केलें. ताणें संवसारीक क्रमवारींत दुसरे सुवातेर आशिल्ल्या हिकारू नाकामुरा आनी तिसरे सुवातेर आशिल्ल्या फॅबियानो कारुआनाक हारयिल्लो. तशेंच फायनलींत कार्लसना आडच्यो पयल्यो दोन क्लासिक मॅची लेगीत बादाबाद दवरपाक येस मेळयिल्लें. पूण, टायब्रेकरांत कार्लसनान पयली गेम जिखली आनी दुसरी गेम बादाबाद दवरली. ताका लागून कार्लसनाक 1.5-05 अशें जैत फावो जालें.
टायब्रेकरांतली पयली रॅपीड गेम कार्लसनान 47वे चालींत जिखली. दुसरी मॅच बादाबाद उरली.
पयले टायब्रेकर गेमींत धव्या घुलांनी खेळपी प्रज्ञानंदान आक्रमक चाली रचून नेटान सुरवात केल्ली. पूण, फाटीं पडिल्ल्या कार्लसनान आपलो अणभव पणाक लायलो आनी 47वे चालींत जैत जोडलें.
प्रज्ञानंदाचेर पयली गेम हारल्या उपरांत दुसरी गेम जिखपाचें चेपण आशिल्लें. पूण, ही गेम 22 चाली उपरांत बादाबाद उरली.
भारताच्या विश्वनाथन आनंदान 21 वर्सां पयलीं म्हणल्यार 2002त ही सर्त जिखिल्ली. ते उपरांत भारताच्या एकाय खेळगड्याक वस्तादपण जोडपाक जमूंक ना. विश्वनाथन आनंद आनी लॅव्होन अॅरोनियन हाणें दरेकी दोन खेपे ही सर्त जिखल्या.
फिडे संवसारीक बुद्दीबळ सर्तीक 2000त सुरवात जाल्ली. जाल्यार 2003 आनी 2004 सर्तीचें आयोजन करूंक नाशिल्लें. ते उपरांत नियमीन रितीन आयोजीत जाता. 2005 सावन नॉकआवट पद्दतीन सर्त जाता.
आतां मेरेनचें वस्तादः विश्वनाथन आनंद (2000), विश्वनाथन आनंद (2002), लॅव्होन अॅरोनियन (2005), गाटा काम्स्की (2007), बोरीस गॅलफंड (2009), प्योत्र वेनियामिनोवीच (2011), व्लॅदमीर क्रॅमनीक (2013), सर्गेई अलेक्झेंड्रोवीच (2015), लॅव्हॉन अॅरोनियन (2017), टिमौर रदजाबोव (2019), जैन क्रिस्टोफ डुडा (2021) आनी मॅग्नस कार्लसन (2023).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
