प्रज्ञानंदाची ‘उझचेस’ करंडाचेर म्होर

भांगरभूंय | प्रतिनिधी

ग्रॅण्डमास्टर आर प्रज्ञानंदान उझबेकिस्तानाच्या ताश्कंद शारांत चालू आशिल्ली ‘उझचेस’ करंड मास्टर्स सर्तीचें वस्तादपण जोडलें. तशेंच ताणें ‘लायव्ह रेटिंगें’त भारताचो पयल्या क्रमांकाचो बुद्दीबळ खेळगडो जावपाचो मानूय मेळयलो. ताणें संवसारीक वस्ताद दोम्माराजू गुकेशाक फाटीं घालो.

‘उझचेस’ सर्तींत अखेरचे फेरये उपरांत प्रज्ञानंद, तशेंच घरच्या प्रेक्षकां मुखार खेळपी नोदिरबेक अब्दुसत्तोरोव आनी जावोखिर सिंदारोव हांचे समान 5.5 गूण आशिल्ले. बरोबरीची ही कोंयडी फोडपा खातीर अती जलद प्रकारांतल्या टायब्रेकराचो वापर करचो पडलो. हातूंत लेगीत तिगांयचे समान दोन गूण जाले. पूण, अखेरचे फेरयेंत 19 वर्सां पिरायेच्या प्रज्ञानंदान काळ्या घुलांनी खेळटना अब्दुसत्तोरोवाक हारोवन वस्तादपणाचेर म्होर मारली.

‘उझचेस’ सर्तींत येस मेळयल्या उपरांत प्रज्ञानंदान ‘लायव्ह रेटिंगें’त लेगीत व्हड उडी घेतली. तो एलो 2778.3 गुणां सयत चवथे सुवातेर पावलो. अजून मेरेनचे कारकिर्दींतली ही ताची सर्वोत्तम कामगिरी आसा. गुकेशाची एलो 2776.6 गुणां सयत पांचवे सुवातेर घसरण जाली. ताका लागून ‘लायव्ह रेटिंगें’त प्रज्ञानंद पयलेच खेपे भारताचो पयल्या क्रमांकाचो खेळगडो थारलो. दुसरे सुवातेर डी गुकेश जाल्यार तिसरे सुवातेर अर्जुन एरिगेसी (2775.7) आसा, संवसारीक क्रमवारींत पयले सुवातेर नॉर्वेचो ग्रॅण्डमास्टर मॅग्नस कार्लसन आसा. ताचे एलो 2839.2 गूण आसात, दुसरे सुवातेर अमेरिकेचो हिकारू नाकामुरा (2807) आनी तिसरे सवातेर अमेरिकेचोच फॅबियानो कारुआना आसा. कारुआनाचे 2784.2 एलो गूण आसात.

प्रज्ञानंदान अंदूं आपलो तिसरो किताब जिखलो. ताणें टाटा स्टील आनी ग्रॅण्डचेस टूर सुपरबेट क्लासिक ह्यो सर्ती जिखल्यात. तशेंच ह्याच म्हयन्यांत जाल्ले स्टेपन अवाग्यान स्मृती सर्तींत दुसरी सुवात मेळयिल्ली.

‘उझचेस’ करंड मास्टर्स सर्तीचे णववे फेरयेंत प्रज्ञानंद, अब्दुसत्तोरोव आनी सिंदारोव हांचे समान गूण आशिल्ल्यान टाब्रेकराचो आदार घेवचो पडलो. हातूंत प्रज्ञानंदाचे 3.5 गूण जाले, दुसरी सुवात सिंदारोवाक फावो जाली. ताचे 3 गूण जाले, जाल्यार अब्दुसत्तोरोव 2.5 गुणां सयत तिसरे सुवातेर उरलो.

मजगतीं, प्रज्ञानंदान सर्तीच्या अखेरच्या दिसा वस्तादपणाचो मुखेल दावेदार आशिल्ल्या अब्दुसत्तोरोव परस एका गुणान आनी सिंदारोवा परस अर्द्या गुणान फाटीं आशिल्लो. अब्दुसत्तोरोवा आडचे मॅचींत म्हत्वाचें जैत जोडून प्रज्ञानंदान अब्दुसत्तोरोव आनी सिंदारोव हांच्या वांगडा बरोबरी सादली.

अर्जुन एरिगसीक लेगीत टायब्रेकरांत खेळपाची संद आशिल्ली. पूण, अरविंद चिदंबरमा आडचे मॅचींत ताका बरोबरींत समाधान मानचें पडलें.

टायब्रेकरांत अब्दुसत्तोरोव आनी सिंदारोव हांणी आपल्यो दोनूय मॅची बादाबाद दवरल्यो, जाल्यार प्रज्ञानंदान धव्या घुलांनी खेळटना तांकां दोगांकूय हारयले. पूण, काळ्या घुलांनी खेळटना हारलो. दुसऱ्या टायब्रेकरांत प्रज्ञानंदान धव्या घुलांनी खेळटना अब्दुसत्तोरोवाक बरोबरींत आडायलो आनी काळ्या घुलांनी खेळटना सिंदारोवाक हारयलो.

भारताचो आदलो पांच खेपेचो संवसारीक वस्ताद विश्वनाथन आनंदान प्रज्ञानंदाक परबीं भेटयल्या.