भांगरभूंय | प्रतिनिधी
तुमकां जर ह्या वेवसायांत येवपाक जाय जाल्यार आवड ही जायच. खेरीज नवें तंत्रज्ञान तुमी आपणावंक जाय.
हालींच कला अकादमीन 21 वे संवसारिक मराठी संमेलन जालें. हांव नियाळ दिना तर हांगा पुस्तकांचे स्टाॅल आशिल्ले तातूंत ‘दीपलक्ष्मी’ चे रायकार आशिल्ले. ह्या दिवाळी अंकाचे संपादक गजानन रायकार. तांच्या पुतान हो वेवसाय मुखार व्हेला. पुस्तक घेतले उपरांत वेळ मेळ्ळो, तेन्ना पुस्तक वाचलें. तांचें नांव आशिल्लें हेमंत रायकार. तांणी सांगलें, हो वेवसाय करपाक बाबान कितले त्रास सोंसले ते सांगलें. ह्या वेवसायांत करियर करपाक बरोच वाव आसा. तांचें कुटुंब तशें कोंकणांतल्या राजापूरांतलें. ढवळे नांवाचो एकलो तांच्या घरा कडेन रावतालो. तांचे वळखीन ते मुंबय बापले. खाशेली गजाल म्हणल्यार तांकां ढवळे प्रकाशनान तांकां नोकरी मेळ्ळी. तें काम तांकां आवडूंक लागलें. मदल्या काळांत तांणी कांय पुस्तकां प्रकाशित केलीं. ती खूब लोकप्रीय जालीं. तरीय तांकां नोकरी सोडची पडली आनी ते प्रकाशन वेवसायांत आयले.
तांकां वाचपाची खूब आवड आशिल्ली. ताचेच वांगडा बरोवपाकूय येतालें. आतां संगणका खातीर बरोवप उणें जालां. तुमकां जर प्रकाशन वेवसायांत येवपाचें आसा जाल्यार कांय गजाली म्हत्वाच्यो. एक म्हणल्यार तुमकां वाचपाची आवड जाय. तशेंच बरोवपाक लेगीत येवपाक जाय. व्याकरण खबर आसपाक जाय. तुमचे कडेन कितलेशेंच साहित्य येतलें. तातूंतलें वाचप्यांक आवडटा तें वेगळें करचें पडटा. आतां तर एआयक लागून जापसालदारकी वाडल्या. वेगवेगळ्या विशयांची पुस्तकां वाच्चीं पडटा. आपूण जें कितें बरयता तें शेवटा मेरेन वाचपाची उमळशीक वाचप्याक लागपाक जाय. आदल्या काळांत लेखकांची संख्या उणी आशिल्ली. तांकां आमी पत्र बरयताले. आतां तें शक्य जायना. लेखकांचे संख्येन भर पडल्या. खेरीज आधुनिक तंत्रज्ञाना खातीर लोकां मेरेन पावपाक नवीं, सोंपीं तंत्रां आयल्यांत. तुमकां जर ह्या वेवसायांत येवपाक जाय जाल्यार आवड ही जायच. खेरीज नवें तंत्रज्ञान तुमी आपणावंक जाय. सगलें साहित्य तुमी नाजाल्यार तुमच्या खात्रीच्या मनशान वाचूंक जाय. एक तर काम करून अणभव घेवपाचो नाजाल्यार शिकून पदवी तरी घेवपाची. ह्या फांट्यांत तुमकां खूब संद आसा. पूण अणभव म्हत्वाचो. बरोवपाचो अणभव तर चड म्हत्वाचो. चौफेर वाचन हांगा सदांत उपेगी पडटा. एकूच भाशा घेवपाक जायना तर इंग्लीश सारकी परदेशी भाशा लेगीत जाणा जावपाक जाय. भारतीय भाशा खबर आसा चड बरें. आचार्य विनोबा भावेक बऱ्योच भाशा येताल्यो. इतल्यो की ते ज्या राज्यांत वताले, थंय कांय दीस रावतकच पयलीं थंयची भाशा शिकताले. हेच पद्दतीन तुमी जें पुस्तक हातांत घेतलें काय ती भाशा तुमकां खबर आसपाक जाय. खाशेली गजाल म्हणल्यार खांडोळे काॅलेजींत अणकार करपाचो पदविका अभ्यासक्रम शिकयतात.
भाशा खंयचीय आसूं, ताचेर तुमचो शेक आसपाक जाय. देवनागरी लिपयेंत ऱ्हस्व, दीर्घ म्हत्वाचे. प्रत्येक पुस्तक छापचे पयलीं व्याकरण, शब्द, वाक्यरचना तपासचीच पडटा. प्रूफ रिडींग हें करचेंच पडटा. तुमचो जर हो पारंपरीक वेवसाय आसा जाल्यार तशें मनीस तुमी नेमिल्ले आसतात. पूण तुमकांय तें खबर आसूंक जाय. आतां एआय धुमाकूळ घालता. ताची म्हायती घेतना तुमकां नवे तंत्रज्ञान कितें, तें खबर आसपाक जाय.
हेमंतजी रायकार सांगताले, एआयचो आमकां फायदो जाला, तो म्हणल्यार आदल्या सारकीं पत्रां बरोवचीं लागना, पूण वाचन चुकोवंपाक मेळना. जें साहित्य तुमचे लागीं पावलां तें एआयचें ना मूं? हें तरी कळपाक जाय. एक मात सांगता, मनीस जात आसा तो मेरेन पुस्तक वाचन चलतलें. म्हणल्यार पुस्तक छापचेंच पडटलें. तुमकां दुसऱ्याक नोकरी दिवपाक मेळटा. पूण तुमकां समाधान दितना हो वेवसाय आत्मनिर्भर करता. हेमंतजी कडेन सांगपा सारकें खूब कितें आसा. ते फुडें केन्नाय सांगूया.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
