भांगरभूंय | प्रतिनिधी
कृष्णा साळकार : दोट्टीकरणाक लागून पर्यटनाक मेळटली उर्बा
भांगरभूंय । प्रतिनिधी
पणजी : हॉस्पेट ते वास्को मेरेन दोट्टीकरणा खातीर खर्च करपाक सर्गेस्त मनोहर पर्रीकार हांचो विरोध आशिल्लो. प्रकल्पाक तांचो विरोध नाशिल्लो. दोट्टीकरणाचो राज्याच्या पर्यटनाक लाव जातलो, अशें सांगून वास्कोचे आमदार कृष्णा साळकार हांणी रेल्वे दोट्टीकरण प्रकल्पाक येवकार दिला.
हॉस्पेट ते वास्को मेरेनच्या रेल्वे मार्गाचें दोट्टीकरण करपाक आदले मुख्यमंत्री मनोहर पर्रीकार हांचो विरोध आशिल्लो, असो दावो आंदोलक तशेंच विरोधी पक्ष करतात. रेल्वेचेर उड्डाण पूल बांदपाचो जालो जाल्यार ताचो खर्च राज्य सरकाराक करचो पडटा. अशें पर्रीकार हांणी म्हणिल्लें. तांचो खर्च करपाक विरोध आशिल्लो. प्रकल्पाक न्हय अशें स्पश्टीकरण आमदार कृष्णा साळकार हांणी दिलां.
हॉस्पेट ते वास्को मेरेनच्या दोट्टीकरणाचो खर्च रेल्वे मंत्रालय करतलें. राज्य सरकाराक खर्च करचो पडचो ना. दोट्टीकरणाक लागून गोंयांतलें पर्यटन वाडपाक मजत जातली. वेपार वाडटलो. हाचे खातीर दोट्टीकरण जावप गोंयच्या हिताचें आसा. कोळशाचे येरादारी खातीर ताडपत्रीचो वापर जाता. प्रदुशण उणें जावपा खातीर उपाय येवजण करपाक वाव आसा, अशें कृष्णा साळकार हांणी म्हणलां. पर्यटन, वेपार तशेंच येरादारी खातीर रेल्वेचो विस्तार जावपाची गरज आसा. हाका लागून हॉस्पेट ते वास्को मेरेनच्या मार्गाचे दोट्टीकरण गरजेचें थारता, अशें आमदार साळकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
