भांगरभूंय | प्रतिनिधी
पणजी : अर्थसंकल्पांत दिल्ले आस्वासनांच्या कार्यवायेचो नियाळ आतां मुख्यमंत्री गती शक्ती पोर्टलाच्या आदारान घेतले. अर्थसंकल्पांतली आस्वासनां तशेंच प्रकल्पांची कार्यवाहीं वेळांत पुराय करपाचे यत्न आसात. प्रकल्पांचे स्थितीचो अहवाल गती शक्ती पोर्टलाचेर घालप सगळ्या खात्यांक बंधनकारक आसा.
अर्थसंकल्पांतल्या आस्वासनांच्या कार्यवाहीचो नियाळ घेवपा खातीर मुख्यमंत्री डॉ. प्रमोद सावंत हांणी सोमारा मंत्रालयांत बसका घेतली. हे बसकेक खात्याचे सचीव आनी मुखेली हाजीर आशिल्ले. मुख्यमंत्री डॉ. प्रमोद सावंत हांणी 2024 – 25 त खातीर 26,855 कोटींचो अर्थसंकल्प सादर केला. अर्थसंकल्प सादर जावन चार म्हयने पुराय जाल्यात. अर्थसंकल्पाचे कार्यवाहीचो नियाळ मुख्यमंत्र्यांनी बसकेंत घेतलो.
केंद्र सरकाराचीं सगळीं खातीं गती शक्ती पोर्टलाचेर प्रकल्पाचे स्थितीची म्हायती अपलोड करताहेच धरतेर आतां गोंय सरकाराच्या सगळ्या खात्यांक प्रकल्प तशेंच येवजणेचे कार्यवाही स्थितीची म्हायती लोड करची पडटली. खंयचो प्रकल्प चालीक लागला, खंयचो प्रकल्प चालीक लागूंक ना, प्रकल्प कितलो पुराय जाला, हाची म्हायती मुख्यमंत्र्यांक खंयच्याय खिणाक उपलब्ध जातली. हाका लागून अर्थसंकल्पांतल्या आस्वासनांची कार्यवाही वेळांत करप शक्य जातलें. अर्थसंकल्पांत जीं आस्वासनां दिल्यात, तीं सगळीं 31 मार्च 2025 पयलीं पुराय करपाची मोख आसा, अशें मुख्यमंत्री डॉ. सावंत हांणी सांगलें. अर्थसंकल्प सादर करचे पयलीं मुख्यमंत्री सभाघरांत घोशणांचे कार्यवाहीचो कृती अहवाल (अॅक्शन टेकन रिपोर्ट) सादर करता. गती शक्ती पोर्टलाक लागून प्रकल्प/ येवजणेचे कार्यवाहीची म्हायती सेगीत उपलब्ध जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
