पोस्टल मतदानाचो काळ उणो करचो

भांगरभूंय | प्रतिनिधी

विरोधी पक्षांची वेंचणूक अधिकाऱ्यां कडेन मागणी

भांगरभूंय । प्रतिनिधी

पणजीः पोस्टल मतदानाचोकाळ एका म्हयन्या वयल्यान उणो करून दोन ते तीन दिसांचो करचो, अशी मागणी विरोधी पक्षांनी केल्या. शेनवारा मुख्य वेंचणूक अधिकारी रमेश वर्मा हांणी येता ते लोकसभा वेंचणुकेचे फाटभुंयेर सगळ्या पक्षांच्या फुडाऱ्यांची बसका आपयिल्ली. ह्या वेळार ही मागणी केली.

मतदान जाले उपरांत टपाली मतदानाक एका म्हयन्याचो वेळ दितात. गोंय ल्हान राज्य आशिल्ल्या ह्य एका म्हयन्यांत टपाली मतदारांचेर प्रभाव घालपाक शकतात. ते खातीर हो काळ दोन ते तीन दिसांचो आसप गरजेचें आसा, अशें विरोधी पक्षांनी म्हणलां.

हे मागणे आम आदमी आनी काँग्रेस पक्षान तेंको दिला. गोंयांतल्या थळाव्या सणांच्या काळांत मतदान घेवचें न्हय, अशीय मागणी ह्या वेळार केली.

बसकेंत लोकसभा वेंचणुकेच्या विवीध तयारी संबंदांत चर्चा जाली, अशें गोवा फॉरवर्डाचे सरचिटणीस दुर्गादास कामत हांणी सांगलें. रमेश वर्मा हांणी सांगलें, वेंचणूक आयोगा वतीन लोकसभा वेंचणुकेंत विवीध पर्यावरणपूरक उपक्रम हातांत घेतले. तातूंत झाडांचे रोपे लावपा सयत हेर उपक्रमांचो आस्पाव आसा. 4 ते 13 ऑक्टोबरा मजगतीं गोंयांतल्या ईव्हीएम तशेंच ववीध व्हीव्हीपेट यंत्रांची तपासणी करतले. हे तपासणे वेलार गोंयांतल्या राजकी पक्षांच्या प्रतिनिधींनी हाजीर रावचें, अशी विनवणी केल्या, अशें तांणी सांगलें.

लोकसभा वेंचणूक एप्रीलांत?

लोकसभा वेंचणूक एप्रील 2024त घेवपाक जातली. आमी ते प्रमाण तयारी करतात. मात निमाणो निर्णय हो केंद्रीय वेंचणूक आयोगाचो आसतलो, अशें रमेश वर्मा हांणी सांगलें.