भांगरभूंय | प्रतिनिधी
डिजिटल पद्दतीन 3 म्हयन्यांत जातली मेजणी
भांगरभूंय । प्रतिनिधी
पणजी : गाय, म्हशी, सुणीं, कोंबड्यो, बोकड्यो, डुकर अशा 16 प्रजाती आनी 221 जातींचीं जनावरां तशेंच सुकण्यांच्या (लिवस्टॉक) मेजणेक सुरवात जाल्या. ही मेजणी डिजिटल पद्दतीन जातली आनी ती 3 म्हयन्यांत पुराय जातली, अशी म्हायती गोरवां सांबाळ खात्याचे मंत्री नीळकंठ हळर्णकार हांणी दिली.
दरेकी 5 वर्सांनी राष्ट्रीय पावंड्यार गोरवां आनी सुकण्यांची मेजणी जाता. गायो, म्हशी, उंट, बोकडां, गाढव, घोडे, सुणीं, सशे, हती, पोल्ट्रीच्यो कोंबड्यो हांची मेजणी जाता. हाचे खातीर गोरवां सांबाळ खात्याचे अधिकारी दरेका घरांत वतले आनी म्हायती घेतले. दरेका घरांनी वचपा सयत गोशाळा, मिलिटरी आस्थापनां हांकां भेट दिवन म्हायती घेतले.
खूबशे लोक व्हड प्रमाणांत सुणीं पोसतात. कांय सुणीं घातक आसतात. जाती प्रमाण सुण्यांची नोंदणी जातली. आतां मेरेन पेशिल्लीं जनावरां आनी सुकण्यांची 20 खेपे मेजणी जाल्या. आतां जाता ती 21 वी मेजणी आसा.
गोंयांत आशिल्ल्यो गायो, म्हशी, पोशिल्लीं सुणीं हांची म्हायती मेळटली. खात्याचे अधिकारी सगळ्यांक भेटी दीत आसतात. हाका लागून रस्ताद सुणीं आनी गोरवांचो आंकडो कळपाक मजत जातली. पोशिल्लीं जनावरां आनी सुकण्यांचेर खूब जाणांचो घरसंवसार निंबून आसता. हाका लागून राज्य तशेंच केंद्र सरकाराक धोरण आंखप शक्य जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
