भांगरभूंय | प्रतिनिधी
पोल्ट्री वेवसायिकांनी घेतली गोरवां सांबाळ मंंत्र्याची भेट
पणजी : हेर राज्यांतल्यान कोंंबड्यो तशेंच तांतयां हाडपी पोल्ट्री गाडयांंची शिमेर पयशां खातीर सतावणूक जाता. शुल्क भरपाक जाय. क्युआर कोड दियात अशी मागणी करीत पुलीस सतायतात, अशी कागाळ पोल्ट्री वेवसायिकांंनी गोरवां सांबाळ खात्याचे मंंत्री नीळकंंठ हळर्णकार हांंचे लागीं केल्या.
सरकारान शुल्क वा क्युआर कोडा विशीं कसलीच अधिसुचोवणी जारी करूंक ना. कोणेय पयशें मागले जाल्यार पुलिशेंत कागाळ करची. कायद्या प्रमाण कारवाय जातली अशें आस्वासन मंंत्री नीळकंंठ हळर्णकार हांंणी पोल्ट्री वेवसायिकांक दिली. मारियो वालादारीस हांंच्या फुडारपणा खाला पोल्ट्री वेवसायिकांनी मंंत्रालयांत सोमारा मंंत्री नीळकंंठ हळर्णकार हांंची भेट घेतली. सतावणुकी आड कारवाय करची, अशी मागणी पोल्ट्री वेवसायिकांनी गोरवां सांबाळ खात्याच्या संचालकांं कडेन केल्या.
कर्नाटकांतल्यान, महाराष्ट्रातल्यान फाटलीं खूबशीं वर्सां पोल्ट्री वेवसायीक गाडयेंतल्यान कोंंबड्यो, तांती हाडटात. नेमा प्रमाण सगले शुल्क फारीक करतात. फाटले दोन दीस रातीं दोडामार्ग चेक नाक्यार गाडयो पुलिसांंनी आडायल्यो. पोल्ट्री संंघटणेचे शुल्क फारीक केला काय? क्युआर कोड दाखयात, अशी मागणी पुलिसांंनी केली. हाका लागून पोल्ट्री वेवसायिकांक बरोच त्रास जालो, अशें मारियो वालादारीस हांंणी सांंगलें. ह्या प्रकरणांत दिवचल पोलीस स्टेशनाचे पुलीस निरिक्षकाची लेगीत भेट घेतिल्ल्याचें तांंणी सांंगलें.
राज्यांत एक रॅकेट सुरू आसा. पोल्ट्री वेवसायिकांच्या गाडयांं वतीन पयशें लुटपाचो वावर सुरू आसा, असो आरोप पोल्ट्री वेवसायिकांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.