भांगरभूंय | प्रतिनिधी
वास्कोच्या भलायकी खात्याचे फिलेरिया डिपार्टमेंटाची काणी; सोंपणार ताटकळटात पालक
भांगरभूंय । प्रतिनिधी
मुरगांवः फावोशी सुवात नाशिल्ल्यान पोलियो डोस दिवपा खातीर आयिल्ल्या पालकां वांगडा भुरग्यांचेय हाल जातात. हे खातीर पालकांनी नाराजी उक्तायल्या.
वास्कोच्या भलायकी खात्याचे फिलेरिया डिपार्टमेंट सध्या फावोशी सुवात नाशिल्ल्यान समस्यांनी घुस्पलां. तांकां सुवात मेळानाशिल्ल्यान ताचो गरजे भायर त्रास लोकांक सोंसचो पडटा. हाका लागून ह्या विभागांत ल्हान भुरग्यांक पोलियो डोस दिवचे खातीर येवपी लोकां मदीं नाराजी पाताळ्ळ्या. आदीं हो विभाग मुरगांव नगरपालिकेंतल्यान चलतालें. उपरांत पालिका नुतनीकरणाचें काम हातांत घेतिल्लें. तेन्ना फिलेरिया विभाग बायणाच्या रवीन्द्र भवनांत व्हेलें. फाटलीं चार- पांच वर्सां ती सुवात ल्हान भुरग्यांक पोलियो डोस दिवपाची बरी वेवस्था जाल्ली. पोलियो डोस दिवपा खातीर ल्हान भुरग्यांक घेवन आयिल्ल्या बायलांक ती सुवात सोयीची आशिल्ली. मात ती सुवात रवीन्द्र भवनाची आशिल्ल्यान तांकां थंय सासणाचें दवरप शक्य नाशिल्लें. ताका लागून तांकां ती सुवात सोडची पडली. दोन म्हयन्यां आदीं भलायकी खात्या वतीन फिलेरिया विभाग वास्कोच्या अवर लेडी ऑफ गिया इमारतीच्या मुरगांव सहाय्यक येरादारी संचालनालय आसिल्ले इमारतीच्या सकयल्या माळ्यार व्हेलां. सहाय्यक येरादारी संचालनालयाक ते इमारतींत सुवात उणी पडटाली, ताका लागून कामकाज बायणाचे नवे सुवातेंत स्थलांतरीत केल्लें. जाल्यार कांय कामकाज हेच सुवातेर चालू आसा. मजगतीं, हे इमारतींत पयल्या माळ्यार भलायकी खात्याचो फिलेरिया विभाग सध्या चलता, पूण तांकां ती सुवात उणी पडटा. ताका लागून भुरग्यांक पोलियो डोस घालपाक येवपी पालकांचे तशेंच भुरग्यांचेय हाल जातात. वराचीं वरां सोपाणांचेर उबे रावून आपलो नंबर केन्ना येतलो ताची वाट पळयत पालकांक ताटकळचें पडटा. तशेंच सध्या माय तापिल्ल्यान उबाळ्याचो त्रास पालकां वांगडा भुरग्यांकूय सोंसचो पडटा. हे खातीर एका म्हयन्या पासून पांच, स वर्सांच्या भुरग्यांचे भलायकेचेर परिणाम जावपाक शकता. थंय बसपाची, उदकाची तशेंच पंख्याची वेवस्था नाशिल्ल्यान एका गुदांवांत उबे राविल्ले वरी लोकांची स्थिती जाता. हे इमारतींत आनिकूय कार्यालयां आसात. तातूंत काम कर्मचाऱ्यांचीय हीच स्थिती आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
