भांगरभूंय | प्रतिनिधी
वॅस्ट इंडिजाचो आदलो दिग्गज अश्टतासांचो खेळगडो किरॉन पोलार्डान आतां आंतरराष्ट्रीय क्रिकेटी उपरांत इंडियन प्रिमियर लिगेंतल्यान निवृत्ती जाहीर केली. पूण, तो अजून मुंबय इंडियन्साचो वांगडी आसतलो. कारण फ्रॅंचायजीन ताचेर व्हड जापसालदारकी सोंपयल्या. फ्रॅंचायजीन ताची मुंबय इंडियन्साचो बॅटींग प्रशिक्षक म्हूण नेमणूक केल्या. फुडल्या हंगामा सावन तो ही जापसालदारकी सांबाळटलो. तशेंच तो एमआय एमिरेट्सा वतीन खेळटना दिसतलो.
पोलार्ड 2010त मुंबय इंडियन्सांत सामील जाल्लो आनी मुंबय वतीन 150 मॅची खेळपी पयलो खेळगडो थारलो. पोलार्डान मुंबय इंडियन्सा वतीन 5 आयपीएल आनी दोन चॅम्पियन्स लीग ट्रॉफी जिखल्यात. रोहित शर्मा पुर्ण तंदुरुस्त नाशिल्लो, त्या वेळार पोलार्डान कांय मॅचींनी मुंबय इंडियन्साचें फुडारपण केल्लें.
पोलार्डान 189 आयपीएल मॅची खेळटना 28.67चे सरासरीन आनी 147.32चे स्ट्रायक रेटीन 3412 धांवड्यो केल्यात. हातूंत 16 अर्द शेंकड्यांचो आस्पाव आसा. तशेंच ताणें 69 विकेटी घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
