भांगरभूंय | प्रतिनिधी
सेरेन्डिपिटी महोत्सवांत स्थलांतर आनी विस्थापनाचेर भासाभास
पणजी: हालींच्या काळांत स्थलांतर आनी विस्थापनाच्यो व्हड घडणुको पळयल्यात. २०२४ ह्या वर्सा संवसारभरचे सुमार १० कोटी लोक स्थलांतरीत जाल्यात. हो इतिहासांतलो एक विक्रम जावन आसा, अशें कला इतिहासकार रहाब अल्हाना हांणी सांगलें. सेरेन्डिपिटी कला महोत्सवाचे (एसएएफ) धावे आवृत्तींत ते क्युरेटर आसात, तांणी ‘डिस्प्लेसमेंट’ हें विशेश प्रदर्शन सादर केलां. हें प्रदर्शन ओल्ड पीडब्ल्युडीकॉम्प्लेक्स पळोवपा खातीर उक्तें आसा.
अल्हाना हांणी सांगलें, सिरिया, इराक, पॅलेस्टायन, अफगाणिस्तान अशा खुबश्या देशांनी व्हड प्रमाणांत स्थलांतरण जालां. तशेंच दक्षिण आशियांतूय व्हडा प्रमाणांत भितरल्यान स्थलांतर जाला. म्यानमारच्यान नागरीक भारतांत येतात, जाल्यार कांय भारतीय श्रीलंकेंत स्थलांतर करतात. कठीण सामाजीक बदल, वर्णद्वेश, तशेंच भारतांतले अल्पसंख्यांक, बहुसंख्याक चर्चांक लागून थळाव्या अणभवांक संवसारीक वास्तवा कडेन जोडपाची प्रेरणा ह्या प्रदर्शना फाटल्यान आशिल्ल्याचें तांणी सांगलें.
ह्या प्रदर्शनात दक्षिण आशिया आनी गल्फ प्रदेशांतल्या कलाकारांच्यो कलाकृती सादर केल्यो. ह्यो कलाकृती आयच्या अस्थिर, संघर्शमय परिस्थितींत निर्माण जावपी फोटवांचेर आनी ताचे फाटल्या प्रस्नांचेर उलयतात. अल्हाना हांच्या मतान, देशांत झुजां सुरू आसा, द्वेष, भंय आनी शीमे वेले वाद आसले, तरी निमाणो ताचो परिणाम मनशाचेरूच जाता. ह्या मानवी पैलूं कडेन लक्ष दिवपूय आयची गरज आसा. ह्या म्हत्वाच्या विशयांचर संवाद सुरू करपा खातीर कला हें सामकें प्रभावी माध्यम.
ह्या संमेलनांत विवीध विशयाचेर कला, चर्चा, साहित्य हाचेर उजवाड घालतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
