भांगरभूंय | प्रतिनिधी
जुलय मेरेन आंकडो पावला 1,166 चेर
भांगरभूंय । प्रतिनिधी
पणजी : गोंयांत पोरूं वर्सा भितर 237 स्टार्टअपांत वाड जाल्या. तातूंतल्या 154 स्टार्टअपांक उद्देग आनी अंतर्गत वेपार उर्बा विभाग (डीपीआयआयटी) मान्यताय मेळ्ळ्या, अशी म्हायती केंद्रीय वाणिज्य मंत्रालयाच्या उद्देग उर्बा आनी अंतर्गत वेपार विभागान दिल्या.
स्टार्टअपा सयत उद्देग आनी क्षेत्रांनी लेगीत बरीच वाड जाल्या. गोंयांतले 56 उद्देग आनी 197 क्षेत्रांनी हे स्टार्टअप कार्यरत आसात. जुलय मेरेन गोंयांत स्टार्टअपचो आंकडो 1,166 आसलो आनी 497 जाणांक डीपीआयआयटी मान्यताय मेळिल्ली. आतां एका वर्सा उपरांत हो स्टार्टअपाचो आंकडो वाडून 1403 मेरेन पावला. तातूंतले 651 स्टार्टअप्सांक डीपीआयआयटी मान्यताय मेळ्ळ्या. 651 डीपीआयची स्टार्टअप्स मदले 270 स्टार्टअप्स हे बायलांनी सुरू केल्यात.
जे स्टार्टअप बरी वाड नोंद करून चड रोजगार निर्मिती करता तांका डीपीआयआयटी मान्यताय मेळटा. ही मान्यताय मेळ्ळे उपरांत खूबश्यो सवलती स्टार्टअप इंडिया येवजणे खाला सरकार ह्या उद्देगांक दिता. देखीक, रीण माफी, सुटसुटीत सरकारी वेव्हार, सरकारी टेंडरा खातीर प्रवेश, कर्मचाऱ्यांक स्टॉक दिवप हे सारकिल्ले फायदे हातूंत मेळटात. हातूंत सगळ्यांत चड आयटी क्षेत्रांतल्या 57 स्टार्टअप्सांक मान्यताय मेळ्ळ्या. अन्न आनी पेय क्षेत्रांतले 48, वेवसायीक आनी वाणिज्य सेवा क्षेत्रांतले 32, भलायकी क्षेत्रांतले 33 आनी पर्यटन क्षेत्रांतल्या 31 स्टार्टअपांक डीपीआयआयटी मान्यताय मेळ्ळ्या. सगल्यांत चड स्टार्टअप गोंयचे राजधानींत सुरू जाल्यात. पणजे शारांत 228, मडगांव शारांत 157, मुरगांव शारांत 81 आनी म्हापशें शारांत 67 स्टार्टअप आसात. उरिल्ले स्टार्टअप दक्षीण आनी उत्तर गोंयच्या हेर वाठारांनी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
